Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



ඔහු යන්නට ගොසිණි. ඉතා දිගු කාලයක් නතර වී සිටි නිවස අතහැර යන්නට ගොසිණි. ඔහුගේ අභිනිෂ්ක්‍රමණය නගරයටම ප්‍රහේලිකාවක්ම වූයේය. දැඩි ආරක‍ෂිත කලාපවල සවිකොට තිබූ ස්වංක්‍රීය අවි ක්‍රියාත්මක විය. ප්‍රධාන මං මාවත් සිසාරා සයිරන් හඬ රැව් දෙන්නට විය. සුවිසල් මන්දිර අතරින් වැටී ඇති පටු මාවත් දිගේ බල්ලන් අතින්ගත් පොලිස් භටයෝ ඒ මේ අත දුවයන දර්ශනය සෑම දිනකම සුලභ දසුනක් විය.

මුළු දවසක්, හමුවන සුළු ඉවක් පසුපස වුවද ඉතා උනන්දුවෙන් පන්නාගෙන යන පොලීසිය, ඇඟරි වැටීගෙන එන යාමයේ බැරැක්කයේ වරැහැලි ඇඳන් මත කනස්සල්ලෙන් දිගා වූහ. රාත්‍රී මුර කිරීමට ප්‍රධාන අණදෙන නිලධාරියා විසින් තවත් සෙබළු පිරිසක් පිටත් කරනු ලැබූහ.

අතුරුදහන් විමෙන් අනතුරුව එක් දිනකදී පමණක්, ඔහුගේ සුවිසාල සෙවණැල්ල ගං දියේ වැටී තිබෙනු නගර වාසීන් කීපදෙනෙක්ම දැක තිබුණි. ඔහු ජීවත් වූ නිවසේ දොර විවර කරගත හැකි වූයේ, ඔහුගේ සෙවණැල්ල ගං දියේ මතු වී හරියටම පැය විසි හතරකට පසුවය. මහල් පහකින් සමන්විත වූ සුවිසල් මන්දිරයේ සිව් දෙසම සෙබළු මුරලාගෙන සිටියහ. නිවස සෝදිසි කළ හෝරා කීපය පුරාම මන්දිරයට ඉහළින් කුරුල්ලෙක් වුවද පියඹා නොගියේය. චිමිණිය කෙළවරින් වරින්-වර සියුම් පුළුටු ගඳක් රැගත් දුමක් පිටවිය. පුළුටු ගඳින් නගරයම වසා ගත්තේය. ඒ නිසාම පොලීසියේ ක්ෂණික, එමෙන්ම ප්‍රමුඛ අවධානය යොමු වූයේ චිමිණිය ඇති කාමරයට පිවිසීමටය. එය එතරම් පහසු කටයුත්තක් නොවීය. මන්දිරය අභ්‍යන්තරයේ විශාල ආගාධ ගොඩනඟා තිබුණි. ඒවායෙහි රැඳවූ නිල් ජල තරංග අතරින්, වරින්-වර දත් අමෝරාගත් කිඹුල්ලු හිස ඔසවා සඟවා ගති. වරක් නොව කීපවිටක්ම ඌ ගේ පිපාසිත දත්වලින් ලිස්සා ගිය කකුල් පොලිස් භටයෝ විසින් මහත් පරිශ්‍රමයෙන් බේරා ගනු ලැබීය. දෙවරක්ම වෙඩි තැබීමට ද සිදු විය. කාමර ගෙබිම මඩ වී තිබුණි. කාමරවල තැනින් තැන නවීන මෝටර් රථවලින් ගැළවූ , අඩක් පිළිස්සී ගිය, නොපිළිස්සුණු, ටයර් කීපයකි. සිවිලිමේ කිසිදු තැනකින් වතුර කාන්දුවන ලක්ෂණ පෙන්නුම් නොකළ ද නිරතුරුවම දැල්වෙමින් තිබූ විදුලි බුබුළු වලින් ජලය ගලමින් තිබුණි. භටයින් දෙදෙනකු හැරෙන්නට සෙසු සියළු භටයෝ ව්‍යාජ හේතු දක්වමින් චිමිණියට ළං වීමෙන් වැළකී සිටියහ. ඔවුන්ගේ දෑස් විෂ දූමයකින් නිලංකාරවී ගියහ. හුස්ම හිරවන්නට ආසන්න විය. අණදෙන නිලධාරයාගේ වියරු වට්ටවන නියෝග දිගෙන් දිගටම ඇසෙන්නට වූයෙන් නිලධාරීන් තව දුරටත් තම ධෛර්ය රදවා ගන්නට උත්සාහ ගනු ලැබීය. පිටු පසට අඩියක් තැබුවහොත් වෙඩි තබන බවට අණදෙන නිලධාරියා දිවුරා කියා සිටියේය. චිමිණිය අසලට ළඟා වූ නිලධාරීන් දෙදෙනාට විශේෂිත කිසිත් සොයා ගත නොහැකි විය. චණ්ඩ මාරුතයකට වුවත් පහසුවෙන් ගසාගෙන නොයන 'අළු ගොඩක්' චිමිණිය අසල ගොඩගැසී තිබුණි. කිසිදු වැඩකට ගත නොහැකි 'පොල් අතු පිළිස්සීමෙන් ගොඩ ගැසුණු අළු ගොඩකැ'යි නිළධාරීහු සටහන් පොතහි සටහන් කරගත්හ.

ප්‍රධාන අණදෙන නිලධාරියාගේ හඬ නැවැතත් ඇසෙන්නට වූයේය. ඔහු දෙපස, ඉහළට නැඟිය හැකි තරප්පු පෙළක් වූයේය. ඔහුගේ මුහුණ නිරන්තරයෙන් දහඩියෙන් දියබරිත වී ගියද, නැවත නැවත පිස දමමින් ඒ බවක් නොහඬවන්නට නිරර්ථක උත්සාහයක නිරතව සිටියේය. අතැති නවීන පන්නයේ ගිනි අවිය සෑම තප්පර කීපයකට වරක්ම වෙවුලන්නට විය. තුවක්කු බඳ තරප්පු පෙළට තබා අල්ලාගෙන, සඟවා ගත් බියෙන් යුක්තවද, මවාගත් ගර්වයෙන්ද ඔහු සෙබළුන් අමතන්නට වූයේය. එකෙනෙහිම අණදෙන නිලධාරියාගේ හිසට ඉහළින් වූ ජනේලය ඔහුගේ දෙපා මුලට කඩා වැටුණේය. කවුළුවේ තීරු අතරින් සිහින් ලේ බිඳු දාරාවක් ගලන්නට වූයේය. ඉන් සියලු දෙනාම සලිත වී ගියහ. අණදෙන නිලධාරියා තප්පර කීපයක්ම නිහඬව සිට ආයාසයෙන් නැවත කතා කරන්නට විය. ඉහළ මාලයේ ඉඟි බිඳින කාන්තාවකගේ සිහින් හඬක් ඇසෙන්නට විය. සෙබළු යුහුසුළු වූහ. ඔවුන්ගේ දෑත්වල නහර ඉගිලී ඉවතට විසිවන තරමටම දැඩි වූහ. මුහුණ සෑම එකකම පාහේ ආයාසයෙන් මවා ගත් එඩිතර භාවයක් සටහන්ව තිබුණි. ඇතැමකු බයාදු බැල්මෙන් මේ මොහොතට හෝ පිටවී යන්නට සමාවක් ලැබෙනු ඇතැ'යි යන වැරැදි වැටහීමෙන් අණදෙන නිළධාරියා දෙස බැලුවේය.

ඉහළ මාලයේ වැදගත් යැයි කිසිත් තිබුණේ නැත. දුහුල් සළුපිළි කීපයක් ඒ මේ අත විසිරී ගොසිණි. ඇඳුම්වලින් ඉතාලියන් සුවඳ විලවුන් වර්ගයක මදහස මතුව එයි. ජනෙල් රෙදි සුදුපැහැති මල්වැලකින් අලංකාර කොට තිබුණි. සෑම ගෙත්තමක්ම අතින් ගෙත්තම් කළාක් මෙන්ය. සිවිලිමේ මැද එල්ලා ඇති එළිය විහිදුවන, ගෝලාකාර, වීදුරු කැටයම් සහිත, විදුලි පහනකි. එයින් වක්කඩකින් ජලය ඇදහැලෙන විට මතුවෙන 'කිණි,කණි ' හඬක් මතුකරමින් තිබුණි. ඇඳන් කීපයකි. මේස අලංකෘත කොට තිබුණි. කළුවර ලීයෙන් කැටයම් කළ ඇඳන්, එකකට එකක් වෙනස්ව, ලා පැහැති විදුලි ආලෝකයෙන් බැබැළෙමින් තිබුණි. මේසයක් මත කිරිගරුඬෙන්, ඉතා පරිශ්‍රමයෙන් කැටයම් කළ වයින් වීදුරුවකි. වීදුරුව පතුලෙහි වයින් බිදු කීපයක් ඉතිරි වී ඇත. රතු ඇඳ ඇතිරිල්ලෙකින් යුත් ඇඳකි. එය මීට නිමේෂයකට පෙර අවුල්කොට ඇත. ගෝලාකාර තසිම් කීපයකට දමනලද 'මැක්රෝන් 'සහ 'නූඩ්ල්ස්' ස්වල්පයකි. තසිම පහළ කොටසේ ලේ පැල්ලම් කීපයකි. සිවිලිමහි බර දරාගන්නට ඉහළට එසවුණු කුළුණු චන්ද්‍රකාන්තී පාෂාණයෙන් නිමවා ඇත. නිරතුරුවම සිහින් මන්දස්මිතියක් බිමට වැටී පැතිර යයි. සෙබළු ඒ මේ අත දුවමින් 'අතුරු දහන් වූ මිනිසා ' ගැන හෝඩුවාවක් හෝ සොයා ගන්නට වෙහෙසිණි. එය වඩාත් නිරුත්සාහී කටයුත්තක් බව අවබෝධ වී තිබුණද කිසිවෙක් එළිපිට ප්‍රකාශ කරනු නොලැබූහ. මුලින් කෙදිරිගෑ කාන්තා ප්‍රාණය පෙනෙන්නට නොසිටියාය.

ජනෙල් කවුළු අතරින් රිංගා ආ සුළඟින් එක්වරම ජනෙල් පලු කීප විටක් වැසීගියේය. ජනෙල් රෙදි සුළගේ පාවී මහල පුරාම ලෙළදෙන්නට විය. ඇඳන්මත එළා තිබූ සුදු පැහැති ඇතිරිලි ජනෙල් කවුළු අතරින් පාවී ඉවතට විසිවී ගියේය. ඉතාලියන් ගීතයක තත්මාලාවක් මතුව එන්නට විය. එකී හඬ අභ්‍යන්තරයෙන්, පෙර ශ්‍රවණය වූ කාන්තාවගේ කෙදිරිල්ල ඇසිණි. වරක උත්සන්න විය. තවත් වරක නිහඬ විය. කාමරය මැද, නෙළා තිබූ නිරුවත් කාන්තා පිළිරුවෙහි මුවෙන් ලේ වෑස්සෙන්නට විය. ඈ කළයක් ඉණට ගෙන සිටියාය. ඇගේ ඡායාව, මුවෙන් වැගිරී ගිය ලෙයින් පිරුණු පොකුණු පතුලෙන් දිස් වන්නට වූවාය. නිලධාරීන් සෙල්මුවා මෙන් නිශ්චල වූහ. ඔවුහු කිසිදු හඬක් නොකිරීමට වගබලා ගත්හ. ප්‍රධාන අණදෙන නිලධාරියා චන්ද්‍රකාන්තී පාෂාණයෙන් සෑදුණු කුළුනට හේත්තු වී සිටියේය. ඔහුව නිමේෂයෙන්, නිමේෂය කුළුණ ඇතුළට ඇඳගනිමින් තිබුණේය. නිලධාරීන් බලාගෙන සිටියදීම, ඔහු කුළුණු අභ්‍යන්තරයේ සැඟවී-අතුරුදහන් වූයේය. කුළුණ කිසිත් නොවූ ලෙසින් පෙර ලෙසම සිහින් ආලෝකය විහිදුවන්නට විය. කාන්තාවගේ විලාපයද ඉහළ මට්ටමකට පත්ව තිබුණි. නිලධාරීන්ගේ රෝම පවා වෙවුලන්නට පටන්ගෙන ඇත. ඔවුහු මෙවැනි අවස්ථාවකට අනුචිත අයුරින් කලබල වී සිටියහ. ඔවුහු ඒ මේ අත දුවමින් පිටව යාමට මඟක් සෙවූහ. මඳ අන්ධකාරයෙන් සියලු පිටවීමේ දොරටු ගිලගත් බවක් දැක ගත හැකි විය. 'නවතින්න'යි එක් නිලධාරීයෙක් බෙරිහන් දෙන්නට විය. මී මැසි කැළක් මෙන් නිලධාරීහු රොඳ බඳින්නට වූහ. ඔහු නව අණදෙන නිලධාරියා ලෙස නිරායාසයෙනම පත් වූයේය. නියෝගපිට එක්වරම බිත්තියට වෙඩි තබා කඩා දැමිය. වෙඩි උන්ඩ වලින් උනුව ගිය කම්බි රත් පැහැ ගැන්වී ඇත. අනතුරුව ඉතා උණුසුම් කාමරයකට පිවිසිය හැකිවිය. එය රාජකාරී කාමරයකි. විශාල වට රවුම් මේසයක්ද, ඒ අභිමුව ප්‍රතාපවත් ආසනයක් ද විය. ආසනයට ඉහළින් සේසත් කීපයක්ම විය. ඒවායෙහි ගුරුළු-රාක්ෂ රුව ඇඳ තිබුණි.

මේසයහි ජපන් නෝට්ටු විශාල ප්‍රමාණක් විසිරී ඇත. 'අතුරුදහන් වූ මිනිසාගේ ' පින්තූරය රැගත් නම් කිහිපයකින්ම පෙනී සිටින හඳුනාගැනීමේ පත් කීපයක්ම විය. හඳුනන අයකු වෙතොත් තොරතුරු දැනුම් දීම වෙනුවෙන් හැඳුනුමපත්හි ඡායාරූප, විශාල කොට මාර්ගයෙහි දෙපස ප්‍රදර්ශනය කරනු ලැබීමට යැවීය. සෑම හැඳුනුම්පතකම අවම වශයෙන් දෙසරයක් හෝ ඉංග්‍රීසි හෝඩියේ 'එක්ස්' අක්ෂරය සටහන්ව තිබුණි. සෑම නාමයකටම පෙර, ගෞරව නාමයක් සටහන් කොට තිබුණි.

මේසයට එපිටෙන් බලු කූඩුවකි. බල්ලාගේ දෑස් තැඹිලි පැහැ ගැන්වී තිබිණි. කූඩුව වටා ඇටකැබිළි ගොඩගැසී ඇත. බල්ලා විසින් මොහොතකට පෙර සූප්පු කළ බවට සළකුණු ඒවායෙහි සටහන්ව ඇත. මේසයත් බලු කූඩුවත් යා කොට එල්ලූ තිරයකි. කුමුදු වැල් මෝස්තරයකින් තිරයෙහි සිව් කොණ කැටයම් කර ඇත. ආදරයෙන් වෙළිගත් හංසයෝ දෙදෙනක් එහි මැදට වී ළැගුම්ගෙන සිටියහ. තිරය පිටුපසින් ඉකිබිදුම් හඬක් සමඟින් දැගැළිල්ලක් විය. තිරය විවර කරබැලීය. එහි අත්-පා පුටුවකට සිරකොට බඳිනු ලැබූ කාන්තාවකි. ඇගේ මුව, රතු පැහැති රෙදි කැබැල්ලකින් බැඳ තිබුණේද, එසේත් නැතිනම් දැඩි පහර කෑමට ලක්ව කැඩී ගිය දත් නිසා වැගිරුණු ලේ වලින් රත් පැහැ ගත්තේදැ'යි සිතාගත නොහැකි විය. පිරිපුන් ගෙලට පහළින් ලේ 'කෙන්දක්' ගලමින් තිබිණි. උරහිස් තැලුම් පහරින් නිල් පැහැ වී ඇත. මුහුණේ කිහිප තැනකම සැපුම් පහරවල් ය. කරවටා එතී ඇති සුදු සේලයකින් පියවුරු තදින් බැඳ, එහිම අනෙක් කොටසින් දෑත් ගැට ගසා ඇත. දිගු ගවුමහි තැනින් තැන ඉරී ගොසිණි. ඇඟම ලෙයින් පිරියම් වී ඇත. පැල්ලම් ලේ පැහැය අතැර පඬු පැහැය ගත්තාක් වැනිය. පාට කළ ඇහිබැම තැලුම් පහරවල් සමඟ විකෘති වී ගොසිණි. මුව තුළට දමා තිබූ 'ග්රෝස්' කැබැල්ල ඉවත් කළ නිලධාරියෙක් ඈ ලණු පහසින් නිදහස් කළේය.

ඇයව පෙරටු කරගෙන පිවිසියේ ගරාජයටයි. විවෘතව තිබූ ගරාජයට ඇතුළුවන තැනම නෙක වාහනයන්හි නම් සටහන් පුවරුවයි. එහි වු නම් අතරින් ගරාජයේ ඉතිරිව තිබුනේ 'ශ්‍රී' වර්ගයේ මෝටර් රථයක් පමණි. ඈ නොපැදිලි, ගෙරවිලි හඬක් නිකුත් කරනු ලැබූවද, එම හඬ උගුර ඇතුළහිදීම වියකී ගියාය. ඇගේ දෙපා දිගේ ලේ වහනය වෙමින් තිබූණාය. ඇගේ ලේ වැකුණු පා සටහන් වලින් ගරාජයේ බිම, රත් පැහැ ගැන්වී තිබුණි. සුළු මොහොතකින් ඇයව සිහිසුන්ව ඇද වැටෙනු ඇත. රෝහලට ගෙන යන්නට ප්‍රධාන අණදෙන නිළධාරියාගෙන් අවසර ගත යුතුය. ඔහු සොයා ගැනීමට උත්සාහ ගනු ලැබූවද ආගිය අතක් නොවූයේය. තවත් නිලධාරීන් දෙදෙනකු සමඟ ඇයව රෝහලට පිටත් කළ පොලීසිය අවට සෝදිසි කරන්නට වූහ. රාජකාරි කාමරයට පිවිසි නිලධාරයකුට අණදෙන නිලධාරියාගේ මිනිය කමින් සිටි බල්ලා දැකගත හැකි විය. නිලධාරියාගේ සිරුරෙන් අඩක් ඉතිරි වී තිබුණි. බල්ලා අදින වාරයක්,වාරයක් පාසා අණදෙන නිලධාරියාගේ හිස දෙපසට පෙරළී යයි. ස්වල්ප වේලාවකින් හිසත් ගිලදමනු ඇත. මන්දිරය ඉහළින් වූ චිමිනියෙන් නැවතත් පුළුටු ගඳ වහනය වන්නට වූයෙන් මන්දිරය වටා පොර බදමින් බලා සිටි මහජනතාව එකා දෙන්නා බැගින් මෑත්ව යන්නට වූහ. නිලධාරීහු මන්දිරයෙන් එළියට එනවිට එකම එක නගර වැසියෙකු සොයා ගත නොහැක වූහ.

මුළු නගරයම පාළුවට ගොසිණි. මිනිස්සු එදිනෙදා ජීවිතය අතැහැර ගොසිණි. ඔවුහු බලාගත්වනම බලා සිටිමින් බොහෝ කල් සිට කාලය විනාශකර දමන්නට පුරුදු වී සිටියහ. මිනිසාගේ අතුරුදහන් වීමෙන් හෝ නගරවාසීහු ප්‍රාණවත් නොවූහ. ඉතාමත් ටික කාලයකින් 'අතුරු දහන් වූ මිනිසා' නැවැත මතුවෙනු ඇතැ'යි ඔවුහු විශ්වාස කළහ. විවාහ වීමට බලාපොරොත්තුවෙන් සිටි තරුණ කාන්තාවෝ විවාහ වීමට කිසිවකු සොයාගත නොහැකිව මන්දිර අතරින් වැටී ඇති පහළ පටු වීදිය දෙස බලා සිටින්නට පුරුදුව සිටියහ. වයස් ගත කාන්තාවන්-පිරිමින් සියළු දෙනාම වයසටම මරණයට පත්විය. අලුතෙන් බිහිවන දරුවකුගේ හඬක් ගත වූ කාලය තුළදී ශ්‍රවණය නොවීය. තරුණියෝ 'අතුරුදහන් වූ මිනිසාගේ' මන්දිරය දෙසට වැටුණු පාර දිගේ පෙරදිනක, තම පෙම්වතුන් සැඳෑ කල ගිය අයුරු මවාගෙන ශෝක වූහ. විවාහයට සූදානමින් දින නියම කරගෙන සිටි පෙම්වතුන් මන්දිරයට ගොස් අතුරුදහන් වූ පසු, ඔවුන්ව සොයා ගිය වැඩිමහල් සහෝදරියන් සිහිපත් කොට කන්‍යාවියෝ නිරතුරුව මන්දිරවල ගිතෙල් පහන් දල්වනු ලැබූහ. නගරයට ඉහළින් පාළු මූසල සුළඟ හමා යන්නට විය. ඉඳහිට 'සයිරන්' හඬ පමණක් ඇසිණි. රාගයෙන් මත් වූ රත් පැහැති කාන්තාවෝ, රත් වූ කම්බිකූරු ගෙන උදුන් ළඟ හිඳ, ඒවා රත්කරමින් දෙකළවා පුච්චා ගත්තාහ.

රෝහල් ගතකළ කාන්තාවගෙන්, ඇගේ නම පමණක් දින කීපයකට පසු කට-උත්තරයක් සටහන් කරගන්නට රැක සිටි නිළධාරීන්ට හැකි විය. නම යශෝදරා ය. තවත් දින කීපයකට පසුව 'අතුරුදහන් වූ මිනිසා' පලාගිය කඳුවැටියෙහි නම අපහැදිලි හඬින් ප්‍රකාශ කළාය. 'යකා හෙළ' සෝදිසි කිරීමට අභිනවයෙන් පත්වූ අණදෙන නිලධාරියා විසින් භටයින් පිරිසක් පිටත්කරනු ලැබූහ. යශෝදරා විසින් දින කීපයකට වරක් වමාරනු ලබන වචනයක් වුවද සුරැකිව සටහන් කර ගැනීම සඳහා නිලධාරීන් සිව් දෙනකු සහ ඇගේ සාත්තුවට තවත් නිලධාරිනියක නතර කරනු ලැබීය. රෝහල් ගත කොට දින පහළොවක් පිරුණු දින ඇගේ උදරය අසාමාන්‍යය ලෙස මෝරමින් තිබුණි. වහාම ශල්‍ය කර්මයක් කිරීමට තීරණය කරනු ලැබිණි. වකුගඩුවෙහි ගල් තැම්පත් වීම නිසා උදරය ඉදිමුණු බවට රෝග විනිශ්චය වූ අතර දැඩි සත්කාර ඒකකයේ දොර විවර විය. සාත්තු සෙවිකාවන් දෙදෙනකු සහ ප්‍රවීන වෛද්‍යවරුන් දෙදෙනෙක් ශල්‍යාගාරයට ඇතුළු වූහ. ශල්‍ය කර්මයෙන් අනතුරුව ගර්භාෂයේ තිබූ බෝතලයක් ඉවතට ගනු ලැබීය. දිගෙන් දිගටම ලේ වහනය වූයේ බෝතලයේ බිදී ගිය තැනකින් ගර්භාෂය තුවාල වී ඇති බැවිනැ'යි වෛද්‍යවරු ප්‍රකාශ කළහ. කැපුම් තලය වසා, මැහුම් ගැසූ නමුදු ඇගේ ජීවිතය ඉතිරිවේ යැ'යි කිසිදු සටහනක් වෛද්‍යවරුන්ගේ මුහුණ මත සටහන් නොවිණි. සිහින් මඳ නල චණ්ඩ මාරුතයක්ව ජනෙල්වල වදිනු ඇසේ. සුළඟ දැඩි සත්කාර ඒකකය ආක්‍රමණය කළේය. විදුලිය විසන්ධි විය. කාමරය අඳුරේ ගිලිණි. අඩියක් පමණ උස ඉටි පන්දමක් දල්වා කාමරයට ගෙනාවේය. ඔක්සිජන් යන්ත්‍රය අක්‍රිය වූ නිසා එක් හෙදියක් යශෝදරාට කෘත්‍රිම ශ්වසනය දෙන්නට වූවාය. ඒ වන විටත් දැඩිසත්කාර ඒකකයේ සාමාන්‍යය ස්වභාවය සම්පූර්ණ වශයෙන්ම කණපිට හැරී ගොසිණි.

යශෝදරා වේදනාවෙන් කෑ ගසන්නට වූවාය. ඇය යමක් පවසන්නට උත්සාහ කළාය. යමක් ප්‍රකාශ කළ හොත් එය සටහන් කර ගැනීමට නිලධාරියකු කැඳවනු ලැබීය. ඇගේ මුහුණේ සෑම අවයවක්ම වියුක්ත වීමට ආසන්නව ගැහෙමින් තිබුණාය. මහත් ආයාසයෙන්, අකුරු එක් කරමින්, වචන එක් කරමින් අවසාන ඉල්ලීම ඉටු කරන ලෙස ඇය, ඇයද සිටියාය. ආදරයෙන් එකම එක පාරක් මුහුණ සිඹින ලෙස ඉල්ලා සිටියාය. මුහුණ ඉදිමී තිබිණි. කම්මුල් කළු පැහැතිය. තොල් පෙති කළු වී කීපපොලක්ම පැළී ගොසිනි. ළැමැද ඉහළට එසවී තන තුඩග පැළී ගොසිනි. කුණු වී යාමට ආසන්නයේ ඇති තියඹරා ගෙඩියක් පැළි ඇති ලෙසින්, මුළු සිරුරම පැළී ගොසිනි. ඇඳ ඇතිරිල්ල ද, ගලන ඕජසින් තෙත බරිත වී ඇත. ඇගේ ශරීරය, ජීවය වියැකීමටත් පෙර මිය ගොසිණි.

ඈව සිප ගන්නා ලෙස ඇයද සිටියාය. කාමරයෙන් මුලින්ම වෛද්‍ය වරු දෙදෙනා පිටව ගියහ. සාත්තු සේවිකාවෝ අවස්ථා දෙකකදී පිටව ගියහ. කට-උත්තර සටහන් කරගන්නට සිටි නිලධාරියා පමණක් කාමරයේ ඉතිරි වූයේය. සුදු පැහැති ඉටිපන්දමෙහි එළිය, සුළෙඟ් ගසාගෙන යයි. ඇගේ ආයාචනාත්මක දෙනෙත් ඔහු දෙසට යොමුව ඇත. නිලධාරියා සටහන් පොත ඉවත තැබීය. ඔහු නැඟී සිටියේය. සිත දැඩිකොට ගත්තේය. ඇගේ දෙපා සිට නෙත් යුගල දක්වාම තම දෑඟිලි ගෙනගියේය. ඕජස් වලින් වරින්-වර දුර්ගන්ධය මතුව ආවද ඒ පිළිබඳව සිත යොමු නොකළේය. හෘද ස්පන්දනය වේගවත් විය. ඈ තව මොහොතකින් මෙලොව අතැර යනු ඇත. ඔහුට ඇගේ අපැහැදිලි දෙනෙත් වලින් කුමක් කියන්නේ දැ'යි සිතා ගැනීමට නොහැකි වූයේය. ඔහු ඇගේ නළලත සිඹ ගත්තේය. ඇගේ දෙතොල් සිහින් මදහසක් නගන්නට මෙන් විවර වී නතර විය. දෑස් කෙවෙනි අතරින් කඳුළු බිදු කීපයක්ම දෙපසට ගලාගෙන ගියේය. හිස එකෙනෙහිම කඩා වැටුණේය.

නගරයේ වීදි මුසල කමින් පිරී ගියේය. 'අතුරුදහන් වූ මිනිසාගේ' මන්දිරයේ චිමිණිය තුළින් නැවැත පුළුටු ගඳ ගුවනට එක්වී නගරයේ වීදි දිගේ ගලන්නට විය. දුර්ගන්ධය ගෙතුළට වද්දා ගැනීමට අකැමැති වූ නගර වැසියෝ දොරවල් අගුළු දැමූහ. බිත්තියටත්-වහලටත් අතර වූ සිදුරු, වැඩ දැමූ සාරි ඉරමින් වසා දැමීය. පියවරුන්ට දාව දරුවන් බිහි කිරීමට සිටි දියණියෝ මෝරනලද උදර බිත්තිවල වද්දමින්, පහර දෙමින්, දරුවන් කුස තුළම මරා දමන්නට උත්සාහ කළහ.

යකාහෙළ සෝදිසි කිරීම් ආරම්භ වී තිබුණේය. කන්ද ඉතාමත් දළ බෑවුම් වලින් පිරී ගියේය. බිම කටු සහිත පඟරු අරක්ගෙන ඇත. කැළෑව අතරින් ඉහළට යන්නට පටු මාර්ගයක් සකස් කරන්නටත්, සකස් කළ මාර්ගය දෙපස සෝදිසි කරන්නටත් පිරිස් යොමු කොට ඇත. පොලීසිය යුහුසුළු විය. මාර්ගය කපන්නට පටන්ගත් දින හවස අණදෙන නිලධාරියාව විශාල ගලක් පෙරලී යාමෙන් පොඩි කර දමනු ලැබීය. මෙතෙක් සිදු වූ සියලු දේවලින් භටයෝ ත්‍රාසයටත්,භීතියටත් පත්ව සිටියහ. කිනම් අවස්ථාවේ තමන් පසු පස මරණයේ සෙවණැල්ල එළවාගෙනු එනු ඇතැ'යි කිසිවකුට සිතා ගැනීමටත් අසීරු විය. යටි පතුල් ගල් පතුරු මෙන් දැඩි වී ඇත. ගල් පතුරු වලින් කැපී ගිය පතුල් වලින් ලේ ගලමින් ඇත. නිලධාරීහු උදේසිට රාත්‍රී වන තුරුම පාර කැපීමේ කටයුතුවල නිරත වූහ. දින කීපයක් ගතවූ පසු බල ඇණිය ප්‍රමාණාත්මකව අඩු වන බව තේරුම් යන්නට විය. එදින රාත්‍රියේ දැඩි මුරකාවල් දමා තිබුණි. බල ඇණිය නිදා ගත් පසු රාත්‍රී මුර සේවයට නිලධාරින් දස දෙනෙක්ම යොදවා තිබුණි. රාත්‍රියේ කිසිදු වෙනසක් සිදු නොවීය. මුර සේවයේ යෙදී සිටි මුර සෙබළු සංචාරය කරමින්, එකිනෙකා හමුවෙමින් අදහස් හුවමාරු කරගත්හ. අලුයම පීදී රාත්‍රී මුරය අවසන් කළ පසු, පෙළ ගැසී ගණන් කරන්නට වූ විට එක් සෙබළෙක් අඩු බැව් අවබෝධ විය. මුරට දමා තිබූ සෙබළකුගේ, ඉරා දමන ලද සිරුරක්, ඉදිරි සෝදිසි කිරීම් වලින් සොයා ගත හැකි විය. එකී සිදු වීමෙන් පසු නිලධාරීහු හොර රහසේම පැන යන්නට වූහ. පැනයන සෙබළෙක් දුටුතැන වෙඩි තබන්නට නියෝග දී තිබුණි. අවසන ඉතිරි වූයේ නිලධාරීන් පහළොස් දෙනෙක් තරම් සුළු ප්‍රමාණයකි. ඉතා අමාරුවෙන් දින කීපයක් පුරාම වෙහෙස වීමෙන් කන්ද තරණය කළ ඔවුන් හට කන්දට එපිටෙන් වූ ඉදිවෙන ගම්මානයක් දැක ගත හැකි විය. පිදුරු හෝ ඉළුක් වලින් සෙවිලි කරන ලද නිවෙස්, දකුණු අප්‍රිකානු ගෝත්‍ර නිවාස සිහිපත් කරනු ලැබීය. සෙවෙළි කළ වහලවල ඉහළින් සිහින් සුදු පැහැති දුමක් ඉහළ අහස සිප ගනිමින් ඉහළ ඇදුණි.

'අතුරු දහන් වූ මිනිසා ' සොයා ගත නොහැකි වීමෙන් සියලු දෙනාම මහත් කනස්සල්ලට පත්ව සිටියහ. දැඩි වෙහෙස නිසාම කිහිප දෙනෙක් සිටි තැන්වලම නිදන්නට පටන් ගත්හ. තවත් අයෙක් ආහාරයට යමක් සොයන්නට ඇවිද ගියහ. ආහාර සොයමින් ගිය භටයකුහට මෑතකදී පාවිච්චි කොට අතැහැර දමනලද ගල් ගුහාවක් හමුවිය. ගල්ගුහාව තද මකුළු දැලකින් ආවරණය වී තිබූණි. ඒවා ලණු තරමටම ශක්තිමත් විය. ගල් ගුහාව ඇතුළේ ගෝලාකාර කුටි කීපයකි. ඉන් කීපයක් විවර කළ පසුව එකක නිදා ගැනීම වෙනුවෙන් සකස් කළ බවට සලකුණු ඉතිරි වී තිබිණි. මීයකු 'චරාස්' හඩින් බිමට සමතලා විය. සුළඟින් දොර වැසීගියේය. 'අතුරු දහන් වූ මිනිසාගේ' මන්දිරයේ චිමිණියෙන් වහනය වූ පුළුටු ගඳක් වැනි ගඳක් මතුවන්නට විය. ගල් පඩියක් මත පළතුරු ගෙඩි කීපයක් කා දමා තිබිණි. ප්‍රධාන ඔහු අණදෙන නිලධාරියා හමු වී 'අතුරුදහන් වූ මිනිසා' ප්‍රථම වතාවට ශාක භක්ෂකයකු වී ඇති බවට දැනුම් දීම සඳහා ආවේය. පුවත ඇසූ එක් නිලධාරියෙක් වියරු වැටුණේය. ඔහු යශෝදරා මිය යනවිට ළඟ සිටි එකම නිලධාරියයි. දත් එකිනෙක හැපෙන්නට විය. ඔහු මදක් විශාල ගල් කුලකට හේත්තු වී ශාප කළේය. එයට පයෙන් ඇන්ණේය. වෙරයොදා පෙරළා දැමීමට උත්සාහ කළේය. ගලන සුළඟ, ගස් පෙරළන්නට සමත් තරමට සසල වන්නට විය. නිලධාරියා යශෝදරාගේ නම උමතු වූවකු ලෙස මුමුණන්නට වූයේය.

කිසිදු වැදගත් දෙයක් සිදු නොවීය. සෙබළාගේ කෙනෙහිළිකම් දරාගත නොහැකි වූවක් මෙන් සුවිශාල හඬක් පිට කරමින් ගල් කුල පහළට පෙරළී ගියේය. හමුවන සියල්ල සුණු විසුණු කරමින් පහළ තද කොළ පැහැය රදවාගත් රේඛාවට එපිටෙන් වූ ගෙයක් අසලට ගොස් නතර විය. ගල බිඳගෙන ගිය පැල් පත් ගණන තුනකි. නිළධාරීහු සිදුවූ දෙය අදහාගත නොහැකිව බලා සිටියහ. ඔවුන්ගේ මහුණු හැඟීම්, දැනීම් මිරිකාහළ දොඩම් ලෙලිමෙන් විය. නිසොල්මන අතරින් අණදෙන නිලධාරියා සිනහ වූයේය. 'අතුරු දහන් වූ මිනිසා' ගල නතර වූ අසළ නිවසෙහි සිටින බව අනුමාන කළේය. විඩා නිවීම පසක තබා සියලු දෙනා වහ-වහා අතුරු දහන් වූ මිනිසා සොයා ගැනීමට ගම්මානය දෙසට යන්නට විය.

ගම්මානයේ පටු මංමාවත් දිගට,ගැමියන් ඉදිරියට යනු දැකගත හැකි වුවත්, ඔවුහු කිසිවකු පොලීසිය සමඟ කතාවට නොගියහ. කතා කරන්නට ගිය සෑම වෙලාවකම ගැමියන් කුමක් හෝ ඉඟියෙන් පවසා අප්‍රිය සහගතව මඟහැර යන්නට විය. තවත් ඉදිරියට ගියවිට පසුම්බි කීපයක්ම හිසමත තබාගෙන පෙර මඟට එන ගැමියන් දැක ගත හැකිවිය. නිලධාරීන් පසු කළ ගැමීහු පසුම්බි ලිහා බැලූහ. එකක ඇමරිකානු ඩොලර්ය, තවත් එකක ජපන් යෙන්ය, ස්ටාර්ලිං පවුම්ය, රන්ය, රිදීය, කිරිගරුඩ පිඟන්ය, වීදුරුය, ඉතාලියන් විලවුන්ය. පසුම්බිය විවරකොට බැලූ සෑම ගැමියෙක්ම තෑගිබෝග පාර දෙපසට විසිකර හිස් අතින් පැල් කොටවලට ඇදුණේය. ගල පෙරළී ගොස් නතර වූ නිවස ළඟට යන විටත් ගැමි ගැහැණුන්ගෙන්, පිරිමින්ගෙන් මිදුල පිරී ගොස් තිබුණි. පිරිමින්ගේ උඩුකය විවෘත වූ අතර කාන්තාවෝ දුර්වර්ණ රෙදි කෑලිවලින් තනපටි බැඳගෙන යටිකය යන්තමින් වසාගෙන සිටියහ. තැරව්කරුවෝ කීප දෙනෙක්ම ගැමියන්ට බඩු බාහිරාදිය බෙදමින් සිටියහ.

පොලිස් නිලධාරීන් දුටු තැරැව් කරුවෝ පලා ගියහ. පැල්පත වටකරනු ලැබීය. ඇතුළට ගිය නිලධාරීන්ට දැක ගත හැකි වූයේ ඇඳක් මත බද්ධ-පරියංකයෙන් අසුන්ගෙන සිටි 'අතුරුදහන් වූ මිනිසා'ය. ඔහු අණදෙන නිලධාරියා දැක නැවත දෙනෙත් පියා ගත්තේය. නිලධාරියා හිසට ගිනි අවිය එල්ල කරගෙනම ඔහුගේ දෑතට මාංචු දමන්ට නියෝග කළේය. අත් අඩංගුවට ගත් පසු ඔහු සමාව ඉල්ලා සිටියේය. ජීවිතය බේරාදෙන්නේ නම් තමන් විසින් කාලාන්තරයක් තිස්සේ මහත් පරිශ්‍රමයෙන් ගොඩ නගන ලද, ආරක‍ෂා කළ,යන්ත්‍රය පිරිනමන බවට පොරොන්දු විය. ඔහු යන්ත්‍රය පෙන්වූයේය. එහි එක් පැත්තකින් ගුහාවක් බදු විවරයකි. බඳ කිරි පැහැතිව ඔපමට්ටම් කොට ඇත. යන්ත්‍රය කෙළවර පොලීතීන් රෝලකි. තැනින් තැන වියළි ගිය ලේ පැල්ලම් සටහන්ව ඇත. 'යන්ත්‍රය' පරිත්‍යාග කිරීමේ අදහසට එකඟ නොවූ විගසම 'අතුරුදහන් වූ මිනිසා' දඩ බල්ලකු මෙන් නිලධාරියාගේ මුහුණට කඩා පැන්නේය. දෘඪ දෑගිලි වලින් ඔහුගේ මුහුණ සුරාදමනු ලැබිණි. වියරු වැටුණු නිලධාරියා 'අතුරුදහන් වූ මිනිසාව' ඔසවා යන්ත්‍රය තුළට විසි කළේය. 'යන්ත්‍රය' ස්වංක්‍රීයව ක්‍රියාත්මක විය. 'අතුරුදහන් වූ මිනිසා'ගේ හඬ යන්ත්‍රය අභ්‍යන්තරයෙන් මතුවන්නට විය. බඳහි වූ පටි කැරැකැවිණි. යන්ත්‍රය කෙළවර වූ පොලිතීන් රෝලය වේගයෙන් සසල වෙමින් මිල සහ බර සටහන් වූ මස් පැකටි තිහක් හතළිහක්ම එළියට විසි කරනු ලැබීය. 'අතුරුදහන් වූ මිනිසාගේ' දෝංකාරය යන්ත්‍රය ඇතුළතින් දෝංකාරදෙමින් ඇසෙන්නට, දැනෙන්ට විය. අණදෙන නිලධාරියා යන්ත්‍රයේ දොරටුව වසා දැමුවේය. උණුසුම් මස් පාර්සල් ගැමි ගැහැණුන් හා පිරිමින් අතර බෙදා දෙනු ලැබුවේය. ගැමියන් පොර බඳමින් එක මස් කෑල්ලක් හෝ උදුරා ගන්නට මහන්සි ගත්හ. ඔවුහු ජයඝෝෂා කරන්නට වූහ.

අණදෙන නිලධාරියාගේ පහරකෑ මුහුණ බිබිලි දමමින් තිබේ. ඉංග්‍රීසි හෝඩියේ 'එක්ස්' අකුරේ හැඩේට බිබිලි ගොනු වී ඇත. රක්ත වර්ණ වූ බිබිලි, පිපිරී ඕජස් ගලන්නට විය. අණදෙන නිලධාරියා තම කීකරු, සුවච නිලධාරීන් කැඳවනු ලැබුවේය. 'යන්ත්‍රය' ඔසවාගෙන 'යකාහෙළ' මුදුනට යන්නට නියෝග ලැබුණි. ගැමියන්ගේ ජයඝෝෂා හඬ මධ්‍යයේ සියල්ලෝම යකාහෙළ මස්තකයට නැඟ ගත්තහ.

'අතුරුදහන් වූ මිනිසාව' සොයාගත් බවත්, ඔහු විනාශ වූ බවත්, පැතිර යන්නට වූයේය. එදිනම රාත්‍රීයේ නිරුවත් කාන්තාවෝ 'අතුරුදහන් වූ මිනිසාගේ' මන්දිරය බිමට සමතලාකර දැමූහ. සියළු ශාපයන් නිමාවූ ලෙසින් මුළු රාත්‍රිය පුරාම නිදා නොගෙන මත්පැන් පානය කළාය. සඟවා තැබූ මංගල සාරි ගෙන දිගහැර බැලීය. තරුණ කාන්තාවෝ කණ්නාඩි අභියස පෙනී සිටිමින්, ඇස් පිහාටු ගලවමින්, පිළිවළට සැරැසෙන්නට වූහ. ඇතැමුන් අකාලයේ වියැකී ගිය තන, පිරිමදිමින් ප්‍රාණවත් කරන්නට උත්සාහ ගත්තාහ. සඳළුතලවලට නැඟී සඳ එළිය ආග්‍රහණය කළාය. බොහෝ කාලයකට පසුව මිතුරියන් හමු විය. එකිනෙකා අනෙකා ලවා තම තමන්ගේ ශරීර පිරිමැද ගත්තාය. කේශකලාපයන් දියෙන් නහවා සුවඳ ගැල්වීය. ඉහළ ආකාශයට නැඟගත් පසු සඳළුතලහි කතුන් දැකගත හැකි වූයේ දඟලන රත්තරන් පණුවන් වැනිය. උදාවන දිනය සියල්ලන්ගේම විවාහය සිදු වන දිනයයි. රත් වූ යවට වලින් පුළුස්සා ගනු ලැබූ කතුන් දෙකළවා තෙලෙන් පිරිමැද සඳුන් තවරනු ලැබිණි.

පසුව දා අලුයම ආසන්න විය. කාන්තාවෝ ලහි-ලහියේ හුණු පැන් ස්නානය කරනු ලැබිණි. තොල් පෙතිමත අංජන තැවිරිණි. කොකුමගර තැවැරිණි. දුහුල් සළු පිළි දවටා ගනු ලැබිණි. සේල සළු යටින් ඔවුන්ගේ රක්තවර්ණ වූ ගාත්‍රා විදුලි ආලෝකයෙන් ප්‍රභාවත් විය. අනුරාගී දෙනෙත් බැබැළෙයි. ඔවුහු සූදානම්ව ඉහළ මාල වලට නැඟී ජනෙල් කවුළු අතරින් වීදි දෙස බැලුහ. පෙම්වතුන් තමන්ව කැඳවාගෙන යන්නට එන තුරු නොසන්සුන් වෙයි.

දිනය උදාවිය. පාළු, මූසල කමකින් මුළු නගරයම පිරීගියේය. 'අතුරුදහන් වූ මිනිසාගේ' බිඳ වැටුණු මන්දිරයේ ඉතිරි වූ දැව කොටන් දැවෙමින් තිබිණි. බිම බලාගත් තරුණයෝ නගරය පසුකොට ගම්මානය හරහා 'යකා හෙළ' දෙසට ඇදෙන්නට වූහ.'යකාහෙළ' විශාල මන්දිරයක් බවට වැඩෙමින් තිබිණි. කිරිගරුඬ ගෝලාකාර පියස්ස, ළහිරු දහසින් ප්‍රභාවත්ව දිදුළමින් ඇත. ඉහළට එසවුණු චිමිණියෙන් දුම් පිටකරමින් ඇත. දුම් ගුලිවලින් පුළුටු ගඳ වහනය විය. ගඳ ගමත්-නගරයත් වසාගෙන පැතිර යන්නට විය. නොනවත්වාම 'යන්ත්‍රයේ' හඬ මන්දිරයේ කවුළු අතරින් ඇසෙන්නට විය. වීදිය දෙස බලා සිටි කාන්තාවෝ තම මුහුණු ශෝකී ගීතයේ ගිල්වා ගත්තාහ. ඔවුන්ගේ විලවුන් වියළී ගියහ. තොල් අග ලේ රසය තැවැරුණි. කාන්තිමත් දෙනෙත් මළානික විය. කවුළුව වසා දැමූ කාන්තාවක් දුවගෙන ගොස් උදුනට පැන්නේය. එකියක කටු වලින් සිරුර සිදුරු කරගන්නීය. තවත් කාන්තාවක් පිහියකින් තන කපා, වීදි දිගේ බිම බලාගෙන මන්දිරයට යන පිරිමින්ට දමා ගැසුවාය.

මන්දිරයේ කරකැවෙන යන්ත්‍රය වෙනුවෙන් ගමේ-නගරයේ තරුණයෝ පෙළ ගැසී සිටියහ. ඔවුන්ගේ දෙපා පමණක් නොව, ආත්මයම ශෝකී ගීතයේ ගිලී තිබුණි. ප්‍රධාන අණදෙන නිලධාරියා දිනකට කීපවිටක්ම සඳළුතලයේ සිට අවානකින් පවන් සලනු දැක ගත හැකි වූයේය. ඔහුගේ පසුබිමින් ඉහළට එසවී වැඩී ගිය චිමිණිය තුළින් කළු දුම් පිට කරමින් තිබුණේය.

එක්තරා දිනකදී කීපදෙනක් විසින් අල්ලාගත් කාන්තාවක, මන්දිරයට ගෙනයනු ලැබූහ. බල්ලාගේ ගෙරවිලි හඬ දිනකට දෙවරක්ම ශ්‍රවණය විය. වියළි සුළඟ හමා ගියේය. කිසිත් විශේෂ දෙයක් සිදු නොවූ විලස හිරු පායා නැවැත සැඳෑ කල බැස ගියේය. නීරසව, අලසකමින් යන්ත්‍රයට තමන්ගේ වාරය එන තෙක් තරුණයෝ පටු මංමාවත් දිගේ පෙළ ගැසී සිටියහ.

['මධු මල් සුවඳ' කෙටිකතා සංග්‍රහයෙනි.]

ගාමිණී බස්නායක



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails