Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



[සුනාමි රළ පහරින් පැරෑළියේදී අනතුරට පත් දුම්රිය අසල තිබූ මළ සිරුරක වූ අත් ඔරලෝසුවක කටු 9.25 දක්වමින් නතර වී තිබිණ.]

"දුම්රිය තව මෙහොතකින්
යළි ගමන් අරඹනු ඇත....
සියළු මගීන් නැවත
තමන්ට නියමිත මැදිරිවලට පැමිණෙන්න.
ගමනාන්තය දක්වා
සෑම දුම්රිය ස්ථානයකම නවත්වනු ඇත..."

9.25 සිට
කාලය කරකවයි
පසුපසට කිසිවෙකු
වියරු කළු රළ පෙළ
වෙරළ වෙත නෑවිදින්
ආපසු ඇදී ගොස්
නොපෙනෙනා ඈතක
නතර වන ලෙස

මරණාන්තයෙන් මෙපිට
අවසාන දුම්රියපළේ
දුරකතනයක් නාද වෙයි.
නොනැවතී
නාද වෙයි…
කිසිවෙකුත් නැත.

කාලය නතර වී ඇත.
රළ පෙළක්
හා
මිනී යායක් අතර
දුම්රියක් නතරව තිබේ.
සදාකාලික පසු තැවීමක
සදා නොමැකෙන
සිතුවමක් ලෙස....

මැදිරියෙන් මැදිරිය
පිය තෙපුල් සිනහ හඬ නැගෙයි.
අඳ වාදකයාගේ ළසෝ ගීයට මුසුව
සිතාරයේ අවසාන සත්සර බිඳී යයි.

කවුළුවෙන් පිටත
ඈත සිතිජය දෙස
සිඟිත්තෙකු නෙත් යොමයි.

ඒ නිමේෂයෙන් පසු
පිළිවදන් පසුවදන් ඇවැසි නැත.

මා මගේ මළවුන් සොයා යනු මිස…..
ඔබ ඔබේ මළවුන් සොයා යනු මිස….

මළමිනී ගොඩ දමන විට
සීරුවෙන් ඇවිද යා යුතුය.
පයට පෑගෙන දින පොතක් වුව
වේදනාවෙන් ඉකිබිඳිනු ඇත.

බැකෝ යන්ත‍්‍රය ඇවිත්
නොමළවුන්ගේ පපු කැනැති හාරයි.
ආත්මය හිස්ව ගොස්
නොමළවුන්
අවතාර ලෙස සැරිසරයි.

සමාන්තර විශ්වයක
කාලය යළි සෙමින් ගලා යයි.
දුම්රිය යළි පිටත් වීමේ
සංඥා නළා හඬ නාද වෙයි.

"දුම්රිය තව මෙහොතකින්
යළි ගමන් අරඹනු ඇත....
සියළු මගීන් නැවත
තමන්ට නියමිත මැදිරිවලට පැමිණෙන්න.
ගමනාන්තය දක්වා
සෑම දුම්රිය ස්ථානයකම නවත්වනු ඇත."

සියළු මළවුනි
තෙතැති පස් තට්ටු බිඳ
මිනී යායෙන් නැගිට
ඉදිමී ගිය අතින් අත අල්ලගෙන
ඇවිත් මෙහි ගොඩවන්න
මිළඟ නැවතුමට වී ඔබේ නෑසියන් බලා හිඳී.

[නිම්තෙර| හිරු| 2005 ජනවාරි 3]

අජිත් සී හේරත්



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails