Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



දෙපස වවා ඇති උත්තුංග විලෝ ගස් දෙපෙළ නිසාදෝ නිදහස් මාවතේ ඇත්තේ කොළඹට නොගැලපෙන පෙනුමකැයි මට සෑම විටම සිතේ.

මම ඒ මාවතෙහි ඉදිරියට ඇවිද යමින් සිටියෙමි.මගේ නිදහස් සිතිවිලි වල ගලායාමට බාධා කරමින් එක්වරම ඇය මතු වූවාය.

‘එස්කියුස් මී, අයැම් සර්චින් ෆෝ ද නැෂනල් මියුසියම්.’

ලා දම් පැහැති ඇදෙන සුළු රෙද්දකින් මසා තිබුණු දණහිස දක්වා පළා තිබූ ගවුම තුළ බැස තිබුණේ හැඩැති තරුණ සිරුරකි. ඇගේ ඇසිපියන් වේගයෙන් සැසලුණි.

ළා රත් පැහැති දලු කිහිපයක් කෙළවරෙහි අමුණාගත් විලෝ රිකිල්ලක් පසුබිම් කර ගත් ඇගේ මුහුණ ආලේඛ්‍ය සිතුවමක් මෙන් මගේ දෑස අල්ලා ගත්තේය. ඇගේ ප‍්‍රසාදජනක සිනහව වතෙහි මේ අංගයෙන් නික්මෙතැයි කිව නොහැකි ප‍්‍රභාවක් පරිද්දෙන් වත පුරාම තැවරී ඇත. ඇගේ නාසය මතත් කොපුල් ශිඛර මතත් පෑදී තිබූ රත් පැහැය ඈ ස්වභාවය කොට ගත්තක් ද, එසේත් නොමැති නම් උණුසුම් දේශගුණය නිසා සිදු වූවක්ද,යන්න සිතාගත නොහැකි විය. (ඒ වන විට දහවලෙහි උණුසුම් ගතිය පහව යමින් සැන්දෑව එළඹෙමින් තිබූ බැවින්.) ඇසට වැටෙන හිරු එළිය හා දුහුවිල්ල නිසාවෙන් දෝ ඇගේ ඇසිපියන් අඩවන්ව තිබිණි. ඇස් යට අර්ධ චන්ද්‍රාකාරයෙන් නිර්මාණය වී ඇති මඳ ගිලා බැස්මේ හැඩය අනුගමනය කරමින් දහඩිය බිඳු කීපයක රේඛාවක් නැගී තිබිණි. ඒවා තිබෙන බව ඇගේ වතට දැනෙන්නේ ද, දැනෙන්නේ නම් ඒ සිසිලසක් ලෙසින් ද, දාහයක් ලෙසින් ද යන්න සිතාගත නොහැකි විය. ඒවා ඇඟිලි තුඩින් ස්පර්ශ කොට පිරික්සන්නට ඇත්නම් යන හැඟුමත් සමඟ එක්තරා කවියක් මගේ මතකය දෙසට ඇවිද ආවේය.(එය මා කලින් ලියා තිබූවක් ද,කොතැනකදී හෝ අසා තිබූවක් ද, එසේත් නොමැති නම් එවේලේම සිතට ආවක් ද යන්න පිළිබඳ නොඅසන්න.)

තනිවීමි ඈ සමඟ
කළු හංසයන් පීනන
විල් තෙරක ඉවුරක, බංකුවක
සරත් කළ සුරත් පත්
එකින් එක විසුරුවන
විසල් මේපල් තුරක සෙවනක ...
ඉඳින් මා බලා ඉමි
ඈ වතෙහි මතුව ආ ඩා බින්ඳු
කෙතරම් සිසිල්දැයි බලන්නට ඇත්නම් යැයි කියා

ඇගේ රුව ඇසට යොමු වූ මොහොතේ සිට කවිය ගෙතී/සිහි වී අවසන් වූ පසුත් මගේ නෙත ඉඳුරාම යොමුව තිබුණේ ඇගේ වතට ය. තුන්වෙනියා පැමිණියේ මේ මොහොතේ ය. ඒ දෙනෙත ද යොමු වී පැවතුණේ මගේ දෙනෙත මෙතෙක් වේලා දැරූ ඉලක්කයටම ය. ඒ රුවෙහි ඇඳුම් වැරහැළි ගොඩක් පමණක් වූ අතර මුහුණ වක‍්‍රාකාර රැළි ගොඩක එකතුවක් බඳු විය. එහි වූ දෑස කුඩා ළමයෙකුට හසුව දිය සිඳී යන අත්ලක උඩුකුරුව දඟලන ඉස්ගෙඩියෙකුගේ බඩවත මෙන් ආයාචනාත්මකව සහ බලාපොරොත්තු සහගතව සසැළෙමින් තිබිණි. ඒ දෑස දුටුවේ අප දෙදෙනාගෙන් ඇය පමණි. මා පිළිබඳව කිසිදු තැකීමක් නොකරන්නේ වූවද, මගේ දෑස ඒ තුන්වෙනි දෑස දක්වා විතැන් විය. ඒ වන විටත් මගේ අතැඟිලි තුන් වෙනියා මෙන්ම කෙට්ටු මගේ පසුම්බිය පුරා ඔබ මොබ දුවමින් තිබිණි. අතිශයින් වටිනා මාරු කාසි කිහිපයක ගැටෙන්නට ඒ ඇඟිලි සමත් විය.

ඒ වන විටත් තුන්වෙනියාගේ දෑසට සිය ඉලක්කය අහිමි වෙමින් පැවතුණි.

ප‍්‍රමාණාත්මකභාවය පිළිබඳව ගැටළු මතුවිය හැකි වුවද මම තුන්වැනියාගේ බලාපොරොත්තුව ඉටු කිරීමට සමත් වීමි. එසැණින් තුන්වන දෑස දුරස් වී ගියේය.

මම පසුම්බිය නැවත සාක්කුවට දමන්නට පෙර නැවත පරීක්ෂා කළෙමි. එහි වූයේ රුපියල් දහයක් පමණි. මා කොටුව බස් නැවතුම්පොළට යා යුතු අතර ඒ සඳහා තවත් රුපියල් දෙකක් උවමනාය. පසුම්බි වලට ඉබේ මුදල් පැමිණෙන ක‍්‍රමයක් පිළිබඳව මගේ විශ්වාසයක් නොවූ බැවින් මම එය නැවත පරීක්ෂා නොකළෙමි. දැන් මා දන්නා හඳුනන අයෙකු පැමිණෙන තුරු රස්තියාදු වීම හෝ මුදල් අඩුවෙන් දී බස් රියේදී අවමානයට ලක් වීම යන දෙකෙන් එකකට හෝ දෙකට ම යටත් විය යුතුය.

ඒ වන විට ඇය වට රවුමෙන් එපිට වෙනත් පාරකට පිවිස එහි ඉදිරියට ගමන් කරමින් සිටියාය. මම වට රවුම හරහා දිව ගොස් අත්පුඩියක් ගසා ඇයට කතා කළෙමි.

‘හේයි මිස්, යූ ආ ෆලොවින් ද කරෙක්ට් වේ.’

බී.ජී.එම්.ජනප‍්‍රිය



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails