Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



ඡේම්ස් තර්බර් [James Thurber]| විසිවන සියවසේ ඇමෙරිකානු හාස්‍යෝත්පාදක සාහිත්‍යයේ පුරෝගාමී නිර්මාණකරුවෙකු වූ ඡේම්ස් තර්බර්ගේ කතා සහ චිත්‍ර, හාස්‍ය මුල්කරගත් සාහිත්‍යයට නව මානයක් එක් කළේය. ලේඛන, රචනා, ළමාකතා, කාටූන්, උපහාසාත්මක ලිපි, විචාර, කවි, කෙටි කතා, සුරංගනා කතා, අනුකරණාත්මක රචනා, නව අර්ථකථනයකින් හෙබි පුරාණ කතා ඇතුලු ශානර ගණනාවකින් පුවත් පත් සඳහා මෙන්ම චිත්‍රපට, නාට්‍ය ඇතුලු වෙනත් විවිධ ක්ෂේත්‍රයන් සඳහා නිර්මාණකරණයේ යෙදුන තර්බර්ගේ කතාවන්ට, එදිනෙදා ජීවිතය, තමන් අවට සිටින ගැහැනු, මිනිස්සු මෙන්ම සුනඛයෝ ඇතූලු නොයෙක් සත්තව සමූහයාත්, විවිධ වර්ගයේ මනඃකල්පිත ජීවිනුත් පාදක විය.

තමා භාවිතා කරන භාෂා ශෛලීන් හා රටාවන් තුළින් පෙර නොවූ විරූ නව අර්ථකථනයන් සැපයීමටත්, විවිධ වූ පැරණි ශෛලීන්-

උපහාසාත්මකව ප්‍රශ්ණ කිරීමටත්, ඔහු පළ කළ හැකියාව මෙහිදී සුවිශේෂ වේ. (-අපේ කාලයේ උපමා කතා. පසුවදන)

"අපේ කාලයේ උපමා කතා", උපමා කතා ශෛලිය මුල් කර ගනිමින් තර්බර් විසින් රචිත කතා කිහිපයක එකතුවකි. පරිවර්තනය- ගයා නාගහවත්ත. ගොඩගේ ප්‍රකාශනයකි. (2008) පහත දැක්වෙන "ආතර් සහ ඇල්ගේ ආදර අන්දරය" කතාව තර්බර්ගේ Fables for Our Time and Famous Poems Illustrated නමැති කෘතියේ අඩංගු වූවකි.

ආතර් සහ ඇල්ගේ ආදර අන්දරය

එකෝමත් එක කාලෙක ඇල් කියලා තරුණ දිය බල්ලෙකුයි ආතර් කියලා ටිකක් තලත්තෑනි දිය බල්ලෙකුයි හිටියා. මේ දෙන්නම ආදරේ කළේ හැඩකාර ලමිස්සියෙකුට. ඇය් තරුණ දියබල්ලා දිහාට හෙලුවේ නෝක්කාඩු බැල්මක්, ඒ මොකද කියනව නං, එයා එහේ මෙහේ දුව පැන සෙල්ලම් කරන, කවදාවත් වැඩක් පලක් නොකරන කෙනෙක්. ජීවිතේ කිසිම දවසක අඩුමගානේ ලී පතුරක්වත් තරම් දෙයක් නිකමටවත් ලෑටි ගාල නැති එයා, කාල බීලා නිදා ගන්නත්, ඇල දොලවල් දිගේ කම්මැලිකමට එහා මෙහා පීනන්නත්, ගෑනු ළමයි එක්ක හැංගිමුත්තන් සෙල්ලම් කරන්නත්, විතරයි සමර්ථකම් දැක්කුවේ. තලත්තෑනි දිය බල්ලා එහෙම නෙවෙයි. එයාගෙ මුල්ම කිරි දත ආපු කාලෙ හිටන්, එයා ඇප කැප වෙලා හිටියේ වැඩ රාජකාරි වලටමයි. එයා කවමදාවත් කාත් එක්කවත් කිසිම විධියක සෙල්ලමක් නම් කරලා තිබුණේ නෑ.


ඡේම්ස් තර්බර්ගේ කාටූන් චිත්‍රයක්


අපේ තරුණ දිය බල්ලා, හැඩකාර ලමිස්සි ගාවට කිට්ටු කරලා ඇහුවාම තමන්ව කසාද බඳින්න කැමතිද කියලා, ඈ කිවුවා, ඔහු මොනව හරි වැඩක් පලක් කරන්න පටන් ගත්තේ නැත්තං, ඈ කොහොමටවත් ඒ ගැන හිතන්නෙ නෑ කියලා. ආතර් මේ වෙනකොට අමුණු තිස් දෙකක් බැඳලා දැන් තව තුනක වැඩ කරගෙන යනවා. ඒත් ඇල්, ජීවිතේ ඇති තුරාවට පාන් ලෑල්ලක්වත්, සුන්බුන් පෙට්ටියක්වත්, තරං දෙයක් හදල නෑ කියලා ඈ කියාගෙන කියාගෙන ගියා. ඇල් කිවුවා බොහෝම කනගාටුයි. ඒත් නිකම්ම ගෑනියෙක් කියපු පලියට තමන් කවදාවත් වැඩට නං යන්නේ නෑ කියලා. එතකොට ඈ කිව්වා එහෙනං ඈ ඔහුට සහෝදරියක් වෙන්නං කියලා. ඔහු පෙන්නලා දුන්නා තමන්ට දැනටමත් සහෝදරියෝ දහ හත් දෙනෙක් ඉන්න බව. ඒ පාර ඔහු තමන්ගේ පරණ පුරුදු ජීවිතේ ගත කරන්න හිතාගෙන ආපහු ආපු දිහාටම ගියා. කනවා, බොනවා, නිදියනවා, ඇල දොල වල පීනනවා, ගෑනු ළමයි එක්ක ඔට්ටු සෙල්ලං කරනවා.


ඡේම්ස් තර්බර්ගේ කාටූන් චිත්‍රයක්


හැඩකාර ලමිස්සි, එක්තරා දවසක දවල් කෑම පැයේදි ආතර්ව කසාද බැන්දා. ඒ මොකද කියනව නම් පැයකට වඩා එක දිගට තමන්ගෙ වැඩ කටයුතු වලින් මිදිලා ඉන්න ආතර්ට පුලුවන්කමක් තිබුණෙ නෑ. ඒ ගොල්ලන්ට දරු මල්ලො හත් දෙනෙක් හිටියා. උන්ට කන්ට අඳින්ට දෙන්න ආතර්ට කොච්චර නං මහන්සි වෙලා වැඩ කරන්න සිද්ධ වුනාද කිව්වොත්, එයාගෙ දත් ඇඳි දෙකම විදුරුමහට වෙනකම්ම ගෙවිලා ගියා.


ඡේම්ස් තර්බර්


එයාගෙ සෞඛ්‍ය තත්ත්වේ වැඩි කාලයක් නොගිහින් හොඳටෝම නරක අතට හැරුණා. තමන්ගෙ ජීවිතේ පුරාවටම එකම එක නිවාඩුවක්වත් ගත නොකර එයා නිස්කාරණේ මැරිලා ගියා. තරුණ දිය බල්ලා දිගටම කාලා බීලා, නිදාගෙන, ඇල දොලවල පීනලා, ගෑනු ළමයි එක්ක අතුරු මිතුරු සෙල්ලං කර කර කාලේ ගත කළා. එයා කවදාවත් මොකවත් විශේෂ තැනකට ආවේ නෑ. ඒත් එයා, සංතෝසෙන් ගත කරපු, දීර්ඝ ජීවිතයකට උරුමකම් ලැබුවා.

ආදර්ශය- කවදාවත් රස්තියාදු නොගහා ඉන්නවට වඩා රස්තියාදු ගහලා සමහර දේවල් අහිමි වුණත් කමක් නෑ.

ජේම්ස් තර්බර්
පරිවර්තනය - ගයා නාගහවත්ත



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails