Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



ලිංගික උත්තේජනය ලබාදෙන ඖෂධ භාවිතය සීග්‍රයෙන් ඉහළ ගොස් ඇති බව පහුගිය දිනෙක වෛද්‍යවරයෙකු පවසා තිබුණා. "ලිංගිකත්වය" කියන වචනය සදාචාර විරෝධී වචනයක් බවට නාමකරණය වෙමින් පවතින විට අනෙක් අතට ලිංගිකත්වය සමාජය තුළ පිළිඹිඹු වන්නේ එක්තරා විකෘති මෙන්ම සාහසික ස්වභාවයකින් කියන එකට උදාහරණ ඕනෑ තරම් අපේ සමාජය ඇතුලේ අහන්න දකින්න ලැබෙනවා. මර්ධනය කර යටපත්කර තිබෙන සාමාන්‍ය මිනිස්සුන්ගේ ලිංගික ජීවිතයේ විකෘතියට හසුවූ අලුත්ම බිල්ල මාතර ප්‍රදේශයේ දස හැවිරිදි පාසැල් සිසුවියක්. රාජ්‍ය සේවයේ වගකීම් රහිත ස්වභාවයත් සමගින් සිද්ධ වූ මේ අවාසනාවන්ත සිද්ධියේ සැකකාර හිටපු නාවික හමුදා සෙබළා කිසියම් (අ)හේතුවක් මත පොලිස් අත්අඩංගුවේ සිට මිය යෑමට පෙර, ඔහු තනියෙන් වගකිව නොයුතු අපේ සමාජ වටපිටාව හා ලිංගිකත්වය පිළිබදව යම් නිරීක්ෂනයක් කරමු.

ඒබ්‍රහම් මාස්ලෝගේ සුප්‍රකට අවශ්‍යතා ධූරාවලියේ මිනිසාගේ ප්‍රාථමික අවශ්‍යතාවක් ලෙස හදුනාගෙන ඇති කෑම, ජලය, වාසස්ථාන, වාතය වැනි දෑ අතරට ලිංගිකත්වයත් ඇතුලත්. ඒ අනුව ලිංගික හැගීමක් ඇතිවෙන එක හරි, ලිංගික සම්බන්ධයක් පවත්වන එක හරි පිරිමියෙක්ට විතරක් නෙවෙයි ගැහැණියකටත් පොදු ස්වභාවික සංසිද්ධියක්. එතකොට ලංකාවෙදි "ලිංගිකත්වය" කියන එකට මධ්‍යම පාන්තික සමාජයේ දැවැන්ත සදාචාර බැම්මක් පැවතීම සොබාදහමට විරුද්ධව යාමක්ද? සිංහල බෞද්ධ මතවාද මූලිකත්වයෙන් ගොඩනැගුණු මේ සදාචාර බැම්ම නීතිගත කරන වත්මන් ආණ්ඩුව විසින් අසභ්‍ය වෙබ් අඩවි තහනම, වැඩිහිටියන්ට පමණයි චිත්‍රපට වාරණය ගෙන ආවා වගේම පහුගිය ‍කාලේ නව යොවුන් විය හා ලිංගිකත්වය ගැන වාර්තා වැඩසටහනක් කරපු නිෂ්පාදිකාවක් වැඩතහනමකට පවා ලක්වුනා.

දැන් ලංකාවේ මධ්‍යම පාන්තික ජනසමාජය තුළ පවතින ලිංගිකත්වය පිළිබද සදාචාරමය විරෝධය කොතරම් දුරකට එය යටපත් කර ඇතිද යන්න ප්‍රශ්ණයක්. එක පැත්තකින් තද කරගෙන ඉන්නකොට තවත් පැත්තකින් එය ඉස්මතුවීම සිදුවන්නේ එක්තරා ආකාරයක විනාශකාරී, විකෘතිමය, සාහසිකමය, හාස්‍යමය, ශිෂ්ඨ සම්පන්න නොවූ ආකාර වලින්. එවැනි උදාහරණ කිහිපයක් සලකා බලමු.

ලංකාවේ සිට ඉතාලියේ රැකියාවට ගිය තරුණයින් එරට පොදු ප්‍රවාහන බස්රථයකට නැංගොත් එරට කාන්තාවන් ඒ බස් රථයෙන් බැස යන බවට හාස්‍ය ජනක විදිහට පැවසුවේ මගේ මිතුරෙක්. ලංකාවේ කාන්තාවන්ට වෙනමම බස් රථ වෙන්කරන්න වෙන්නෙත්, දුවලගේ ආරක්ෂාවට අම්මලට බස් එකේ යන්න වෙන්නෙත් ලංකාවේ මේ කියන විකෘති කාමය සහිත වූවන් නිසා. තවත් කෙනෙකුගේ ශරීරයට අනවසරයෙන් අතතැබීම කොතරම් අශිෂ්ඨ දෙයක් වුවත් වසර දෙදහසක් බුදුදහමින් පෝෂිත ලංකාවේ තමයි වැඩිම බස් ජැක්කරුවන් ඉන්නේ. මේ තත්ත්වය සමාජයක පුරවැසියන් ලෙස අප කොපමණ ලැජ්ජාවට පත්විය යුතු තත්ත්වයක්ද?

ලිංගිකත්වය පිළිබදව ලාංකික ජන සමාජයට ඇති පීඩනය පෙනෙන තවත් තැනක් තමයි සිංහල වෙබ් අඩවි. ඒවායේ දැන්වීම් ලෙස පළකර ඇති වැකි නිරීක්ෂනය කළහොත් එකී ප්‍රාථමිකත්වය දැකගන්න පුළුවන්.

"කියන ගාන නෙවෙයි, කාමරේට ගියාම තව ගාණක් - ගණිකාවෝ රෑට අටවන උගුල්"
"සැලීනා ඛාන් දූෂණයට - නිරුවත් වෙයි, පූනම් පාණ්ඩේ නොකරාට මමනම් කරනවා - සැලීනා"
"කෙල්ලෝ නාන තැන් වල වීඩියෝ"
"ලංකාවේ ප්‍රසිද්ධ නිළියකගේ පස්ස පැත්ත ෆේස් බුක් එකේ"
"කෙල්ල කකුල උස්සයි, කොල්ලන්ට ආතල්"
"නිළියගේ රහස් ප්‍රදේශය වීඩියෝ කළ කැමරාශිල්පියා මාට්ටු- වීඩියෝ සහිතයි"
"වැල්ලවත්ත බීච් එකේ කෙල්‍ ලෝ නාන ගමන් කරපු ෆැෂන්"


මෙවැනි ආකාරයේ දැන්වීම් මගින් ජනප්‍රියත්වයක් ලබාගැනීමට ආදාළ වෙබ් අඩවි වලට හැකියාව ලැබී ඇත්තේ ඊට සරිලන ආකාරයේ ‍පාඨක පිරිසක් ලංකාවේ සිටින නිසා.

ලංකාවේ අනියම් ප්‍රේම සම්බන්ධතා ගැන තවත් ප්‍රසිද්ධ ස්ථානයක් වන්නේ දුම්රිය. උදේ හවස දුම්රියෙන් රැකියාවට යන එන පිරිස් අතර සිටින පිරිමි හා කාන්තාවන් විසින් දුම්රියට පමණක් සීමාවූ ආදර සම්බන්ධයක් ගොඩනගා ගන්නවා. තමන්ගේ ආදරවන්තයාට හෝ ආදරවන්තියට අසුනක් වෙන්කර ගැනීමේ සිට ආදර බස් දෙඩීම, කෑම කැවීම, ඔඩොක්කුවේ තබාගෙන යාම, අවස්ථාවක් ලද විට කැමැත්තෙක් සිදුකරන ස්පර්ෂ තමයි මේ සම්බන්ධ වල ලක්ෂණ. සතියේ දිනවල දුම්රියේ සහකරු හෝ සහකාරිය ද සති අන්තයේ දිනවල සිය සැබෑ සහකරු හෝ සහකාරියද සමග දුම්රියේ යෑම සුලබ සිදුවීමක්.

ගුරුවරයා අතින් සිසුවිය දූෂණය වෙන එකත්, ආගමික නායකයෙකු අතින් සිය දායිකාවක දූෂණය වන එකත්, සිය පියා අතින් දියණිය දූෂණය වෙන එකත් පිළිබදව උදාහරණ ඕන තරං දෙන්න පුළුවන්. ලිංගිකත්වය පිළිබදව මෙතරම් සදාචාරමය සීමා බන්ධන වශයෙන් ගොඩනගා ඇති පරිසරයක ඒවා සිදුවීම ඇතුලේ මේ පොදු සමාජ පිළිගැනීම් තව දුරටත් කොතරම් වලංගු ද කියන එක සලකල බලන්න අපිව පොළඹවනවා.


ලිංගිකත්වය අමුතු දෙයක් බවට පත්වෙන්නේ ගෑණු ළමයෙක් වැඩිවියට පත්වුනු ගමන්මයි. එතන ඉදලා සාම්ප්‍රදායික ගැණූ පිරිමි ලිංගිකත්වය මැජික් එකක් කරන අතරේ බොහෝම නූතන විදිහට ලිංගිකත්වය මොඩර්න් මැජික් එකක් වෙන්නේ ගෑණු පිරිමි වෙන වෙනම පාසැල් වලට යවන ෆැෂන් එකත් එක්කයි. කෙල්ලෝ කොල්ලොන්ගෙන් බේරගෙන, කොල්ලෝ කෙල්ලොන්ගෙන් බේරගෙන අනාගත ලෝකයට හරියන රොබෝවරයා නිර්මාණය කරන කොට සම්, මස්, ඇට, හැගීම්, දැනීම් වලින් හැදිලා ඉන්න මේ ජීවියගේ ලිංගිකත්වය විකෘති වෙන එක අහන්නත් දෙයක්ද?

ලංකාවේ ලිංගිකත්වය ගැන සාපේක්ෂව විවෘත භාවයක් ඇති තැනක් තමයි විශ්ව විද්‍යාල කියන්නේ. එක්තරා විදියට එහි වන උපසංස්කෘතිය හා බැදුණු වටපිටාවක් මත සාපේක්ෂව විවෘත භාවයක් එහි දකින්න පුළුවන්. ඒ පවතින ස්වභාවය ගැන යටි හිතින් ඇති කැමැත්ත උඩට සදාචාර සළුපිළි අන්දලා විනය නීති හැටියට ක්‍රියාත්මක කරන්න දරණ උත්සාහයන් කොළඹ, ජයවර්ධනපුර වගේම, කැළණියටත් ළගදිම දකින්න පුළුවන්.

‍ලිංගිකත්වය පිළිබදව වන අපේ සමාජයේ ආකල්ප ප්‍රශ්ණ කෙරෙන සාකච්ඡාව ඉතා පැතිරුණු එකක්. මොකද ඒක සමාජයේ මුල් බැසගත් සංස්කෘතික කාරණයක් වගේම, පරිපාලන, නීතිය වගේ දිශාවන්ට විහිදුනු ව්‍යූහමය එකක්. මාතර සිසුවිය දූෂණය වීම කියන්නේ මේ සමස්ත සමාජ ව්‍යූහයේම තවත් එක විකෘති සාහසික සිදුවීමක් මිස හුදු එක මිනිසෙක් නොහික්මුණු ක්‍රියාවක් නෙවෙයි. සමාජයේ තියෙන පීඩනයන් සියල්ල මේ සිදුවීමත් සමග එකී සැකකරුවා මත පටවලා ඔහුගේ මරණයෙන් මිනිස්සුන්ගේ හිත් සනසවා ගන්න පුරුදු වුනාට මෙවැනි සිදුවීම් වල අවසානයක් ඒ මගින් බලාපොරොත්තු වෙන්න බැහැ.

සුපුරුදු ලෙස හැඟීම්බරව මේ සිදුවීමේදී ක්‍රියාකරනවා ද නොඑසේ නම් මේ සමාජයේ නැවතත් මෙවැනි අවාසනාවන්ත සිදුවීම් නොවීමට ක්‍රියාත්මක වනවා ද යන්න තීරණය කරන්නේ අපේම ඔළුගෙඩිය. කණගාටුවට කරුණ නම් එවැනි බුද්ධිමය වෙනසකට අවශ්‍ය සිතීමකට අපව සංස්කෘතිකවම හුරු පුරුදු වී නොමැති කමයි.

"විවාහයට බාහිරව පැවති ලිංගික සම්බන්ධතාවය අනිකුත් ඕනෑම සමාජ ආයතනයක් මෙන්ම ඒවාට සමාන වූවකි. පුරුෂයාට පක්ෂව ලිංගික ස්වාධිනත්වය දිගටම ගෙයන සම්ප‍්‍රදායකි. ඇත්ත වශයෙන්ම මෙයට විරුද්ධ නොවූවා පමණක් නොව, විශේෂයෙන්ම පාලක පංතිය විසින් මහත් වූ උනන්දුවකින් මෙය ප‍්‍රගුණ කරනු ලැබේ. එහෙත් එය වචනයෙන් පමණක් ඔවුහු හෙළා දකිති. කෙසේ වුවද මේ හෙළාදැකීම නිසා පීඩා විදින්නේ එයින් තෘප්තියට පත්වන පිරිමින් නොවේ. ස්ත‍්‍රීන් පමණකි. ඔවුන් සමාජයෙන් නෙරපා ගෝත‍්‍රයෙන් පිටමං කරනුයේ පුරුෂ වර්ගයා ස්ත‍්‍රී වර්ගයා මත සම්පූර්ණ ආධිපත්‍ය පතුරුවා තිබෙන බව සහ එය සමාජයේ මූලික නීතියක් බව නැවත වරක් ප‍්‍රකාශ කිරීම සදහාය."

පවුල, පෞද්ගලික දේපොළ හා රජය ඇතිවූ හැටි
-එංගල්ස් 69 පිටුව


සුමුදු තිවංක ගමගේ



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails