Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



"මේ නුඹලාගේ පාපයන් සමා කරනු වස් වැගිරීමට නියමිත මාගේ රුධිරයයි. මා පිළිබඳ මතකය වෙනුවෙන් එය පානය කරන්න සහෝදරවරුනි."
- ජේසුස්


එළැඹ ඇත්තේ නික්ම යා යුතු පැයයි.
සමු ගැනීමේ එළිපත්ත අසල දී
රිදුම් දෙන මගේ හදවත ගොළු ය.
ඔබ විසින් හැර දමන ලද මේ දෑත්
මරණයේ සීතලෙන් හිරිවැටී ඇති නමුත්
සහෝදරයෙකුගේය……

හිරු ගිලී ගිය
නිම්තෙරට නෙත් හෙළමි.
සටහනක් නොතබා ම සැඟව ගිය
අපේ පරපුරට කියාගත නොහැකි වූ
කොතෙක් නම් දේ
ගැඹුරු සුසුමන් විලස
මේ අහස යට විසිරී ඇත්ද?

සෙවණගල කඳවුරේ දොරටුව අසල
පුතු සොයා වැළපෙන මවක විය.
ඉන් බොහෝ කලකට පසුව
ඇය මිය නො ගියානම්
තාම ඇය එතැන
වැළපෙමින් සිටිනු ඇත.
මරණයේ භීතියෙන්
රැහැයියන් පවා නිහඬ වූ රාත‍්‍රීවල
මම ඇය අසල සිටියෙමි.

අළුගෝසු දෑත් සැඟවුණු
සුදෝසුදු උපාසක සළුවල
තැවරුණු රුහිරු ලුහුබැඳ
මරා ගින්නෙන් හළු කළ
පරපුරක වෛරය රැගෙන ආවෙමි.

නැගෙනහිර වෙරළේ අඳුරු සිර කුටියක
හුදෙකලා වූ දියණියක ළසෝ ගීතය
ඔබේ සවනට මිමිණුවෙමි.

කළුවරට එරෙහි ව එකින් එක දැල්වුණ
මේ මහා පහන් වැට නිවී යන්නට නො දී
අවදියෙන් සිටියෙමි.

යළිත් ඔබ කිසිදාක නො එතැයි
උන් දෙඩූ වහසි බස් නොතකා ම
ඔබ එතැයි බලා සිටියෙමි.
පෙරමගට විත් පිලිගතිමි.
එහෙත් ඔබ නො බලාම ගියෙහිය.

කඩිමුඩියේ නික්ම යන විට
මග හැරෙන, මගහැරුණු
බොහෝ දෑ තිබිය හැක.
බොහෝ දුක් දරාගෙන
දිවි පිදූ පරපුරෙක නිහඬ වීරත්වය විසින්
උන් වෙතින් වසන් කළ
ඔව්, උන්ට සොයාගත නො හැකිවම
මේ බිමේ සැඟව ගිය අවසාන රයිපලය වුව
මගහැරී දිරා යන්නට ඉඩ තිබේ.

නිය සිඳුණ ලේ ගලන සහෝදර අතකින්
මරණයට පෙරාතුව වධකාගාර බිත්තියක ලියවුන
අවසාන පණිවිඩය වුව
මගහැරෙන්නට ඉඩ තිබේ.

නවාලි දෙව් මැදුර කෙළවරක
හුදෙකලා බිළිඳු මළකඳ රැගෙන
හුරු පුරුදු උපහාස සිනහ මැද
අසූ නවයේ සොහොන් බිම් වෙත ගියෙමි.
නො මළ ගෙයකින් අබ සොයනු පිණිස නොව
මේ මහා මිනී කඳු අසල සිට
සිතන්නට බොහෝ දේ ඉතුරුව ඇති
බැවිනි.

කොළොන්නාවේ විසිර ගිය කළු දුමාරය මත
මෙසේ ලියැවී තිබිණ.
"යාපනයට පාන් නැත
මෙහි පාන් ඇත."
ඒ ලියූ අත් නිසලව
අගනුවර වීදීයක වැතිරී තිබිණ.

නො හඳුනන භූමියක
දිවිපිදූ ගරිල්ලෙකු වේ නම්
ඔහු සටන් වැදුනේ තම ජනතාව
වෙනුවෙන් නම්
ඔහු කවුරුන් වුවද
නිසැකව ම ඒ
අසූ නවයේ දී මළ මගේ සොයුරාය.

සහෝදරවරුනි
මා ඔබට පේ‍්‍රම කළාක් මෙන්
ඔහුට ද පේ‍්‍රම කරමි.

ඒ මළ කඳට කෙළ ගසා සතුටු වන
දෙනෝදාහක් අතරට පැමිණ
උස් හඬින් කෑ ගසා මෙසේ කීවෙමි.
"නවතපල්ලා මිනිසුනි
ඒ මාගේ මෙන් ම නුඹගේ ද සහෝදරයාය."

මා පාවා දෙනු ලැබූයේ එනිසාය.
ඔබේ නොසරුප් වදන් මැද
මගේ හඬ මැකී ගියේය.
සිහිනයෙන් හෝ පවු නො කළ
බොහෝ පින් බර දෑත්
වීසි කළ ගල් මුල් වලින්
මගේ හිස පුපුරා ලේ ගැලී.
ඉතිහාසයේ
පාපී ඉඳුල් දිය කඳ
මගේ හිස මත හැලූහ.

හදවතින් ලේ ගලන මේ පැය
පවරා ඉතිහාසයේ විනිසට
දහසක් සටන් බිම් වල
ළබැඳුණු සොයුරු මතකය
ඔබ ළඟ තබා නික්මෙමි.

දිලි දිලි දැවෙන පුපුරන
මල් වෙඩි අරක් ගත් මේ රැය
පවුකාර අඳුරටම ඉඩ දී
හිරු රැස් ගිලී මියැදිණ.

-හිරු- 1996 ජනවාරී 14

සටහන-

1989/90 මහා සංහාරයෙන් දිවි ගලවගත් තරුණ පරපුරේ ප්‍රකාශනය බවට පත් වූයේ හිරු පුවත්පතයි. ජවිපෙයේ නො නිල ප්‍රකාශනය ලෙස හැඳින්වුණු හිරු පුවත්පත, 1995 දී චන්ද්‍රිකා බණ්ඩාරනායක යළි දෙමළ ජනතාවට එරෙහිව යුද ප්‍රකාශ කරන විට සෘජුවම එයට එරෙහි ස්ථාවරයක් ගත්තේය. හිරු පුවත්පතේ මෙම යුධ විරෝධී ස්ථාවරයත් ඒ වනවිට කෙමෙන් යළි සිංහල ජාතිවාදී ස්ථාවරයන් කරා යමින් සිටි ජනතා විමුක්ති පෙරමුණේ නායකත්වයත් අතර මතවාදී ගැටුමකට හේතූ විය. නවාලී දෙව්මැදුරට එල්ල වූ ගුවන් ප්‍රහාරයකින් මියගිය දෙමළ දරුවන්ගේ සේයා රූ හිරු පුවත්පතේ පළවීමත් සමගම ජවිපෙ නායකත්වය හිරු පුවත්පත දෙමළ බෙදුම්වාදයට සේවය කරන්නේ යැයි චෝදනා කරමින් හිරු පුවත්පත වර්ජනය කරන ලෙස තම සාමාජිකයන්ට සහ හිතවතුන්ට දැනුම් දෙන ලදි. හිරු පුවත්පත පළවීම නවත්වන්නට ගත හැකි සෑම පියවරක්ම ජවිපෙ විසින් ගනු ලැබිණ.

යුද්ධය යළි ඇරඹීමත් සමගම කෙමෙන් සිංහල ජාතිවාදයටත් යුධවාදයටත් නතු වූ සිංහල සමාජය තුළ තවදුරටත් අලෙවිය කඩාවැටුණු හිරු පුවත්පත ආර්ථික දුෂ්කරතා හේතුවෙන් පවත්වාගෙන යාමට නොහැකි විය. ජවිපෙ සහ හිරු අතර ගැටුම අතරමැද සම්මුතියකින් තොරව අවසන් වූ අතර ජවිපෙ සිංහල ජාතිවාදයටත් රජයේ යුද්ධයට පක්ෂපාතී ස්ථාවරයකටත් යොමු වූ අතර හිරු පුවත්පත දෙමළ ජනයාගේ ස්වයංතීරණය පිළිගන්නා ස්ථාවරයකට යොමු විය. ආර්ථික දුෂ්කරතා හේතුවෙන් හිරු පුවත්පත 1996 ජනවාරීයේදී නැවැත්වීමට සිදු වූ අතර මෙම කවිය එම අවසන් කලාපයේ පළ වූවකි. හිරු පුවත්පත වටා ගොනුවී සිටි බහුජන පාඨකයා ආකර්ෂණය කරගනු වස් ජවිපෙය විසින් "සිතිජය" සගරා සහ පසුකාලීනව ලංකා පුවත්පත ආරම්භ කරන ලදි. ලංකා පුවත්පත ආරම්භයේ සිටම යුධවිරෝධී ප්‍රගතිශීලි වාමාංශයට එරෙහි සිංහල ජාතිවාදයේ වෛරී ප්‍රකාශනය බවට පත් විය. ඉතිහාසයේ යමක් පළමුවර සිදුවන්නේ ශෝකාන්තයක් ලෙස වන අතර දෙවන වර එයම සිදුවන්නේ නම් ඒ විගඩමක් ලෙස පමණි.

අජිත් සී හේරත්



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails