Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



එක්දහස් නවසිය හැත්තෑ තුනේ මාර්තු විසි හත් වෙනි දින ඇකඩමි සම්මාන උළෙලේ දී සෂීන් ලිට්ල්ෆෙදර් නම් තරුණ රතු ඉන්දියානු කාන්තාවක්, ගෝඩ් ෆාදර් චිත්‍රපටයේ රංගනය වෙනුවෙන් මාලන් බ්‍රැන්ඩෝට ප්‍රදානය වූ හොඳම නළුවාට හිමි ඔස්කා සම්මානය ප්‍රතික්ෂේප කිරීම සඳහා වේදිකාව මත නැගී සිටියාය.

"මාලන් බ්‍රැන්ඩෝ... ඔබට පවසන්නැයි මගෙන් ඉල්ලා සිටියා... මේ මොහොතේ ඔබ සමග බෙදා ගන්නට නොහැකි මුත් - කාලය මදකම නිසා - පසුවේලාවක මාධ්‍ය වෙත ඉදිරිපත් කරන්නට මා ඉතා කැමැත්තෙන් සිටින දීර්ඝ දෙසුමකින්... ඔහුට ඉතාමත් කණගාටුවෙන් මේ නොමසුරු සම්මානය ප්‍රතික්ෂේප කිරීමට සිදුවී ඇති බව. මේ පියවරට හේතුව නම්.... වර්තමානයේ සිනමා කර්මාන්තය ඇමරිකානු ඉන්දියානුවන්ට සලකන ආකාරය... මට සමාවෙන්න... රූපවාහිනි චිත්‍රපට නැවත විකාශන තුලින් සහ ‘වූන්ඩඩ් ක්නී’* හි මෑතක දී වූ සිද්ධීනුත්ය. මම මේ සැඳෑව ආක්‍රමණය නොකල බව කාරුණිකව සඳහන් කරනවා... කෙදිනක හෝ අනාගතයේදී... අපි... අපේ හදවත් සහ මනස් ආදරයෙන් හා දයාවෙන් මුණ ගැසෙනු ඇති. මාලන් බ්‍රැන්ඩෝ වෙනුවෙන් ඔබ හැමට තුති."

‍ප්‍රේක්ෂකාගාරයේ සිටි සමහරු අත් පොලසන් දුන්නද බොහෝ දෙනා අවමන් (booed) ** කලහ. හොඳම චිත්‍රපටයට හිමි සම්මානය පිරිනමමින් ක්ලින්ට් ඊස්ට්වුඩ් එම සම්මානය "ජෝන් ෆෝඩ්ගේ ‘වෙස්ටර්න්’ චිත්‍රපට වලදී වෙඩි කෑ සියළුම ‘කව්බෝයි’ ලා වෙනුවෙන්" නම් කල යුතු නොවේදැයි විමසීය. මයිකල් කේන් බ්‍රැන්ඩෝ විවේචනය කරමින් තමුන් නොපැමිණ "අසරණ දුප්පත් ඉන්දියානු දැරියකට සියළු අවමාන විඳීමට සැලැස්වීම" ගැන චෝදනා කළේය.

උත්සවය අවසානයේ, ලිට්ල්ෆෙදර්, පහත පලවන බ්‍රැන්ඩෝගේ සම්පුර්ණ ප්‍රකාශය මාධ්‍ය වෙත ඉදිරිපත් කළාය.


නිම නොවූ ඔස්කා කථාව - මාලන් බ්‍රැන්ඩෝ
මාර්තු 27, 1973

වීඩියෝව මෙතනින්-

"ඔබේ ආයුධ බිම තබන්න මිත්‍රවරුනි, එවිට අපට එක්ව ජීවත්වන්නට පුළුවන්. ඔබේ ආයුධ බිම තැබුවොත් පමණයි මිත්‍රවරුනි, අපට සාමය ගැන කතා කරන්නත් ඔබට යහපතක් වෙන ගිවිසුමකට එන්නටත් අපට පුළුවන්" කියායි, පසුගිය වසර දෙසීය පුරාම, ඔවුන්ගේ නිජ බිම්, ජීවිත, දුවා දරුවන් හා නිදහස වෙනුවෙන් සටන් කළ ඉන්දියානු ජනයාට අපි කිව්වේ.

ඔවුන් ආයුධ බිම තැබූ පසු, අපි ඔවුන් මරා දැම්මා. අපි ඔවුන්ට බොරු කිව්වා. ඔවුන් රවටා ඔවුන්ගේ ගම් බිම් පවරා ගත්තා. ඔවුන් නිරාහාරයේ තබා ගිවිසුම් කියා අප හඳුන්වන ඒත් අපම බිඳ දමන ප්‍රෝඩාකාරී පොරොන්දු පත්‍රවලට අත්සන් ගත්තා. විශ්වයේ ජීවය පහල වූ දා පටන් ජීවනය දුන් මහාද්වීපයක ජීවිතය යදින්නන් බවට ඔවුන්ව පත් කලා. ඉතිහාසය මොන ආකාරයෙන් අර්ථ දැක්වුවත්, මොන ආකාරයෙන් විකෘති කර ලියුවත්, අපි කර ඇත්තේ වරදක්. අපේ ක්‍රියාව නීතිගරුක නො‍වනවා වගේම සාධාරණ වන්නේත් නැහැ. මේ ජනයා පුනරුත්ථාපනය කරන්නට, මේ ගිවිසුම් ගරු කරන්නට අපට අවශ්‍යතාවයකුත් නැහැ. මන්ද, අනුන්ගේ අයිතිවාසිකම් සිඳබිඳ දමන්න, ඔවුන් සතු දේ උදුරාගන්න, තමුන්ගේ ජීවිත, භූමිය හා නිදහස ආරක්ෂා කර ගන්නට උත්සාහ කරන මිනිසුන් මරා දමන්න අයිතියක්, අපේ බල පුළුවන්කාරකමේම වරප්‍රසාදයක් හැටියට අපට ලැබී තිබෙන නිසා..., ඔවුන්ගේ ගුණගරුකකම් අපරාධ කරන්නත්, අපේ අධමකම් සිල්වත් ගතිගුණ කරන්නත් නිදහසක් අපට තිබෙන නිසා...!


එහෙම වුනත් මේ අගතියේ සීමාවන්ගෙන් පිටස්තර එක් දෙයක් තිබෙනවා. ඒ ඉතිහාස‍යේ භයංකර තීන්දුවයි. ඉතිහාසය නිසැකව ම අපේ ක්‍රියා විනිශ්චය කරනවා ඇති. නමුත් අපි ඒ ගැන තකනවාද? ඉතිහාසයේ පිටුවක් පිටුවක් පාසාමත්; පසුගිය සියවස මුළුල්ලේ ඇමරිකානු ඉන්දියානු ජනතාව පිපාසිතව හා නිරාහාරව ගෙවූ සෑම නින්දා සහගත රාත්‍රියක්, දිනයක් පුරාමත්; වසන් කරන්නට බැරි සත්‍යයක් ලියැවී තියෙද්දීත්, ඒ සියල්ලටම පටහැනිව, අපේ ජාතික හ‍ඬේ උපරිමයෙන්, මුළු ලෝකයටම ඇසෙන්නට "අපි අපේ වගකීම් අත්‍යන්තයෙන්ම ඉෂ්ඨ කර ඇත්තෙමු" යි මුර ගාන්නට අප පොළඹවන්නේ කුමන ආකාරයක සදාචාරමය භින්නෝන්මාදයක් ද?

ප්‍රතිපත්ති ගරුක වීම; අසල්වැසියාට ප්‍රේම කිරී‍ම; අපේ මේ දේශයේ අක්‍රීය වෙලා. අප කර ඇති, අපේ බලගතු කම යොදවා සපුරාගෙන ඇති එකම දේ, අප අමානුෂිකය, අපි අපේ ගිවිසුම් ගරු නොකරන්නෙමුය කියන හැඟීම් තුලින්, අපේ ලෝකයට අළුතින් එකතු වූ රටවලත්, අපේ මිතුරන්ගේ මෙන්ම සතුරන්ගේත් බලාපොරොත්තු බිඳ දැමීම පමණක් කියායි අද පෙනෙන්නේ.

සමහරවිට මේ මොහොතේ ඔබ ඔබටම මුමුණනවා ඇති... , මේ දේවල ඇකඩමි සම්මාන සමග ඇත්තේ මොන බහුබූත සම්බන්ධයක් ද? මේ ගැහැණිය මෙතන සිටගෙන ඉන්නේ, අපේ මේ උත්කර්ෂවත් සන්ධ්‍යාව කබාසීනියා කරන්නේ, අපේ නොවන, අපට කිසිම විදිහකින් අදාල නොවන මේ දේවල් මෙතැනට ඇදගෙන ඇවිත අපේ ජීවන රටාවට අනවසරයෙන් ඇඟිලි ගසන්නේ, බලහත්කාරයෙන් අපේ ගෙවල් වලට ඇතුළු වී අපේ වටිනා කාලය හා මුදල් නාස්ති කරන්නේ ඇයි... ?

මම සිතන්නේ, මේ නිහඬ ප්‍රශ්න වලට පිළිතුර ඉන්දියානුවන්ගේ ආත්ම ගරුත්වය කෙලෙසීමේත්, ඔවුන්ගේ හැදියාව සමච්චලයට ලක්කරමින් එය ම්ලේච්ඡ, එදිරිවාදී සහ අතිදුශ්ශීල එකක් යැයි හැඳින්වීමේත් වගකීම; අනෙක් හැමදෙනාමත් පමණටම සිනමාකරුවනුත් දැරීමය කියායි. අද ලෝක‍යේ ළමයින්ට නිදහසේ හැදී වැඩෙන්නට ඇති බාධක ඕනෑවටත් වඩා තිබෙනවා. රූපවාහිනිය නරඹන, චිත්‍රපට නරඹන, ඉන්දියානු දරුවන්ගේ මනස්, ඒ චිත්‍රපට වල ඔවුන්ගේ ජාතිය නිරූපනය කර ඇති ආකාරය දැකීමෙන් මොන තරම් රිදුම් දෙනවාදැයි අපට සිතාගන්නට වත් නොහැකියි.

මෑතක දී මේ තත්වය නිවැරදි කිරීමේ උදාසීන උත්සාහයන් කීපයක් මතුවුනත්, ඒවා ඉතාමත් උදාසීන හා සුළුතර ඒවායි. ඒ නිසා, සිනමා වෘත්තියේ සාමාජිකයකු ලෙසත් එක්සත් ජනපද පුරවැසියෙකු ලෙසත්, අද රාත්‍රියේ මේ උළෙලේ දී සම්මානයක් භාර ගැනීමේ හැකියාවක් මට තිබෙනවායි හැ‍ඟෙන්නේ නැහැ. මම හිතන්නේ ඇමරිකානු ඉන්දියානුවන් ගේ තත්වයෙහි ප්‍රබල වෙනසක් සිදුවන තෙක් මේ දේශයෙහි මේ කාල වකවානුවේ සම්මාන දීමත්, ලබාගැනීමත් නුසුදුසු ක්‍රියාවන් කියායි. අපට අපේ සොයුරන්ගේ ආරක්ෂකයන් වෙන්නට නොහැකි නම් අඩුම ගණනේ ඔවුන්ගේ ඝාතකයන් නොවී ඉන්න පුළුවන්.


මට අද රාත්‍රි මෙතනට ඇවිත් ඔබ අමතන්නට නොහැකි වුනේ, මේ මොහොතේ "වූන්ඩඩ් ක්නී" වෙත ගොස්, මහ පොළව මත ගංගාවල් ගලායන තුරුත්, තණපත් ලියලන තුරුත්, සදාකාලයටම අපකීර්තියක් වන සාමයක් ස්ථාපනය කිරීමට තැත් කිරීම, මට හැකි පමණින්, වැලැක්වීම වඩා ඵලදායකයැයි මම සිතන නිසායි.

මෙයට සවන්දෙන අය මේ ක්‍රියාව අශෝබන බාධා කිරීමක් ලෙස නොව, ‘මතකයේ සීමා වලිනුත් එපිට කාලයක සිට තමුන් ජීවත් වූ භූමියේ ස්වෛරී‍ව හා නිවහල් ව රැ‍ඳෙන්නට සෑම ජනතාවන්ටම හිමි අහිමි කල නොහැකි අයිතිය පිළිබඳව අපි විශ්වාස කරන්නෙමු’ යි, මින්මත්තට පවසන්නට මේ දේශයට ඇති අයිතිය තීරණය කරන්නට තරම් ප්‍රබල වියවුලක් සම්බන්ධව ඔබ හැම දෙනාගේ සිතුවිලි යොමු කිරීමේ අව්‍යාජ උත්සාහයක් ලෙස සලකනවා ඇතැයි මම බලාපොරොත්තු වෙමි.

ඔබේ කාරුණිකත්වය ට හා ලිට්ල්ෆෙදර් මෙනෙවියට දැක්වූ අනුග්‍රහයට තුති. ස්තුතියි, ශුභ රාත්‍රියක්.


* වුන්ඩඩ් ක්නී - 1890 දී 150කට අධික ඇමරිකානු ඉන්දියානුවන් පිරිසක් වටලා ඝාතනය කෙරුණු ස්ථානයක් ලෙස ‍ඓතිහාසික වැදගත් කමක් ඇති දකුණු ඩැකෝටාවේ ස්ථානයකි (woundedkneemuseum.org). 1973 දී ඇමරිකානු ඉන්දියානු ව්‍යාපාරය (aimovement.org) විසින් මෙහෙයවුනු සන්නද්ධ නැගී සිටීමක් හේතුවෙන් මෙම ස්ථානය නැවත වරක් ඇමරිකානු ඉන්දියානුවන් ගේ අරගලය දියත් වූ ස්ථානයක් බවට පත්විය.

** Booing - බටහිර රටවල ජනයා සිය ප්‍රීතිය, අනුමැතිය පළකරන්නේ, අපේ රටේ අවමානයක් ලෙස සලකන්නාවූ ‘හූ’ (hooting) හඬිනි. විරෝධය හා අවමානය හඟවන්නේ ‘බූ’ (booing) හඬිනි.

පරිවර්තනය - රන්සිරිමල් ප්‍රනාන්දු



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails