Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers


මේ දකුණු කොරියාවේ ජිඔන්යූ අන්තර්ජාතික සිනමා උළෙලේ දී (JIFF - JEONJU INTERNATIONAL FILM FESTIVAL) ශ්‍රී ලාංකික සිනමාවේදී අශෝක හඳගම සමඟ පුවත්පත් කලාවේදියෙකු කරන ලද සම්මුඛ සාකච්ඡාවක සිංහල පරිවර්තනය යි.

මේ චිත්‍රපටය හදන්න ඔබව පෙළඹවූ හේතුව කුමක්ද?

JIFF ප්‍රේක්ෂකයින්ට මතක නම්, මම මුලින් ම ඔවුන්ට ඉදිරිපත් කරපු චිත්‍රපටය ‘මේ මගේ සඳයි’. ඒ 2000 වසරෙදි. එය එම වසරේ හොඳම චිත්‍රපටයට හිමි Wusuk සම්මානය දිනා ගත්තා. එහි තේමාව වුණේ අපේ රට තුළ එවකට පැවති, බැලු බැල්මට අවසානයක් දකින්නට හැකි වෙතැයි කිසිවෙකු නොසිතූ යුද්ධය නිසා, ඉතා දුෂ්කර මායිම් ගමක විසූ සිංහල ප්‍රජාවක සාමාජිකයින් සතු වටිනාකම් සහ සම්බන්ධතාවල ස්වභාවය වෙනස් වූ ආකාරය යි. ඒ ‘කිසිදාක අවසාන නොවෙතැයි පෙනුණු යුද්ධය’ 2009 මැයි මාසෙ දි එල්ටීටීඊ යුධ යාන්ත්‍රණය රජය හමුදාමය යුධ බලය විසින් විනාශ කර දැමීමත් සමඟ අවසන් වුණා.


ඉතා දීර්ඝ වූ වසර තිහක් තිස්සේ ඇදී ගිය යුද්ධය නොසිතූ අවසානයකට ළඟා වුවත් එයින් මේ ර‍ටේ සාමාජයීය ජීවිතයට වුණු බලපෑම එතරම් ඉක්මණින් නැති වෙලා නෑ. යුද්ධයෙන් විනාශ කරන ලද උතුරේ ගම් සහ නගරවල යලිත් ජීවිතය හුස්ම ගන්නට පටන් ගැනීමත් සමඟ පීඩාවට පත් ප්‍රජාවන් දැන් මුහුණ දෙන්නේ වසර ගණනක් තිස්සේ ඔවුන් දිනා ගන්නට යුධ වැදුණු ‘වාර්ගික නිදහස‘ටත් එහා ගිය නවතම ගැටළු රාශියකට යි.

ජීවත්වීම සඳහා කෙරෙන අරගලය යුද්ධයටත් වඩා අමිහිරි, අවදානමින් පිරි, අසීරු එකක්... ශීඝ්‍රයෙන් වෙනස්වෙන තාවකාලික මහා පරිමාණ සංවර්ධන වාතාවරණය තුළ ‘ජීවිතේ කුඩා අංශුවක්’ වෙනුවෙන් සටන් වදින, දුක් විඳින මිනිසුන් මා දුටුවා. ‘යුද්ධය’ හෝ ‘යුද්ධයේ අවසානය’ යන ද්වයම ‘යුද්ධයට විසඳුම‘ නොවන බව රජය සහ ජනතාව යන දෙපාර්ශවය ම වටහා ගත යුතු බව මට හැඟුණා.

ඔබේ චිත්‍රපටයේ ප්‍රධාන ‍තේමාව මොකක්ද?

කෙටියෙන් ම කිව්වොත් ‘ජීවිතය සියල්ලට ඉහළින්’...!

සංග්‍රාම භූමිය මත සිය ජීවිත පූජාකළ නිර්භීත වීරයින් අප කොතෙකුත් දැක තිබෙනවා. එබඳු මරණ යුද්ධය තුළ දෙපාර්ශවයෙන් ම උත්කර්ෂයට නැංවුණා. නමුත් ජීවිතයේ ඇත්ත වටිනාකම තියෙන්නේ වෙන තැනක. ‘ඉනියවන්’ කියන්නේ සියලු සමාජ- දේශපාලනික යථාර්ථයන්‍ විසින් වඩ වඩාත් බියකරු සහ මරණීය බවට පත් කරන ලද ‘ජීවිතය’ සඳහා වන සටන ගෙන යාමට අධිෂ්ඨානයෙන් අරගල කරන්නාවූ සියල්ලන්ට පිදෙන උපහාරයක්.

JIFF හි කොටස් කරුවෙකු වීම ගැන හැ‍ඟෙන්නෙ කොහොමද?

JIFF කියන්නේ මම හැමදාමත් ආසාවෙන් මගේ නිර්මාණ ඉදිරිපත් කරන තැනක්. මම JIFF වලට සම්බන්ධවෙන්නෙ එය පටන් අරගෙන දෙවන වසරෙ ඉඳන්. එහි දී මුල ඉඳලම චිත්‍රපට නිර්මාණකරණය සැලකුණේ කිසියම් කලාත්මක ප්‍රකාශනයක් ඉදිරිපත් කරන බැරෑරුම් විධික්‍රමයක් ලෙස සහ කෙනෙකු‍ට නිර්මාණ විශ්වාසයක් ඇතිව අනාවරණය කළ හැකි තැනක් ලෙස. මට හරිම සතුටුයි එබඳු වැදගත් උළෙලක සමීපතමයෙක් වෙන්න ලැබීම ගැන. මම හරිම කැමැත්තෙන් තමයි මෙහි රැ‍ඳෙන්නෙ.


සිනමාව කියන එක ඔබ අරුත් ගන්වගන්නෙ කොහොමද?

මට සිනමාව කියන්නෙ හුදු රසවින්දනයකට එහා ගිය දෙයක්. හරියට ම කිව්වොත් එය ‘සමාජාවබෝධයට පත්වීමේ’ මාවතක්. ඒ නිසා මම මගේ නිර්මාණ සලකන්නේ භාරදූර කාර්යයන් විදිහටයි. චිත්‍රපයක් හදන්න පටන් ගිනිද්දි මම සූදානම් වෙනවා දුක් විඳින්න සහ කැපකිරීම් කරන්න. මම මේ තාක් කරල තියෙන්නෙත් එහෙමයි. ඉදිරියටත් ඒක එහෙම ම වේවි.

වාණිජ යථාර්ථයන් තුළ හුඟ දෙනෙක් විශ්වාස නොකරන දෙයක් තමයි සිනමාවට මිනිස්සු වෙනස් කරන්න පුලුවන් කියන එක. මේ තාක් සාර්ථක වෙන්න බැරි වුණත් මම තදින් ම විශ්වාස කරනවා එය කළ හැකියි කියලා.

ඔබට ප්‍රේක්ෂකයින් සමඟ බෙදා ගන්නට පණිවුඩයක් තියෙනවද?

මේ චිත්‍රපටය තමයි මම දෙන පණිවුඩය; කිසියම් නිශ්චිත පණිවුඩයක් චිත්‍රපටය තුලදී නිවේදනය නොවුනත්.


මට නිරන්තරයෙන් ම මගේ ප්‍රේක්ෂකයා සමඟ බෙදා ගන්නට අවශ්‍ය දේ තමයි අපි මේ ජීවත් වෙන සමාජය පවතින්නේ, තියෙන්න ඕනෙ හොඳම විදිහට නෙවෙයි කියන එක. අපි එකට එක්ව එය වඩා යහපත් තැනක් බවට පත් කළ යුතුයි. සිනමාව කියන්නේ අපේ අවි ගබඩාවේ තිබෙන ඉතාම සංකීර්ණ ප්‍රබල අවියක්. ඒ ගැන ඇති විශ්වාසය කිසිවිටෙක බිඳ ගන්න එපා!

උපුටා ගැනීම- JIFF වෙබ් අඩවියෙන්
පරිවර්තනය - මාලතී කල්පනා ඇම්බ්‍රෝස්



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails