නොසෑහෙන කාලෙකින් අස් නොකළ මේසයේ
පොත්පත්තරපෑන්බෝතල්ක්රීම්බිස්කට්කවරචොකලට්
පෙට්ටිසිකරට්කොරෙක්ස්බෝතල්පත්තරපොත්ජම්බොපීනට්
අස්සෙ සැඟවුන
කිරමනා පාටැති බර යමක්
රෝල් වී රෝල් වී බිම වැටිණ
මා පයක ඇඟිලි තුඩු තැලිණ
තිලිණිගේ තිලිණයේ බර සමව
රොමැන්තික සිත්තම් ඇඳෙන සැඳැවක
මැණික් ගං අතු කෑල්ලක වදලේ
චූටි ගල් කැට පීරගෙන එන
පෙණ ඉලිප්පෙන වතුරට
දෙකකුල් ඔබාගෙන දනිස් තෙක්
පද්ද පද්දා වැදෙනකොට එකට
ඉහ ඉහ අහසට වතුර වැලි කැට රැඳුන
පරණ සිංහල චිත්රපටියක
චිත්රයක් ඇන්ද හැටි
මතක ගං ඉවුරු වල වදිනවා
උකුකමක් නොදැනීම ඇස් අගට
උනනවා සිත්තමේ බොඳ උන තින්ත
උඩ එන්න පාරමී දම් පුරන රෝල් වෙන
ලෝක ගෝලයෙ හැඩ උරාගත්
බර දැනෙන ගලක් ගෙන අතට
ඇසීමි මම මොකද්ද මේ.. වස්තුව හාං..?
”දුක් උහුලන ජීවිතයක්..”
ගලක පවා ජීවිතයක බරපතලක් දකින්නි ඇය
”ම්හ්..නෑ”
”මෝඩ කවි පදේක බිත්තරයක් වෙයි අයියෝ”
තේ කහටක රතට දෙතොල
උල් උනාය හුරතලේට
කාලයක් තිස්සේ තිලිණයකි
ගෙල බිඳුන මෙ ගල මට
තිලිණිගේ කිරමනා පැහැ සෙනේ සිහිකරන
මැණික් ගං අතු කෑල්ලක ඉලිප්පුන
කාල කඩිකුලප්පුව
යතුරු නැති මාංචුව
වැටිණ දෙහදක පේ්රමයට. වෙන වෙනම.
දැන් දැන් ඉඳහිටෙක
මඟ හැරුන ඇමතුමක ජංගම
වල් වැදුන සීනු තානය
ඇහෙන්නෙත් හවසකට නෑසෙන ස්වරයක එතුන
ආලෝකෙ පෙට්ටි කළ බිත්ති බඩ ඇතුළතක
සංසාර ගැට්ටේ වැතිරිලා
ඇස් කුඩා වෙන දුමක මිහිරේ
මතක කෘතියේ පිටෙන් පිට ඉරනකොට..
(*'සංසාර ගැට්ට' යනු සරසවි උපසංස්කෘතික භාෂාවෙන් ඇඳන් දෙකක් යා වෙන තැනයි)
සුදර්ශන සමරවීර
