Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



ස්වභාවිකවම ත්‍යාගශීලිවන්තයෙකුට, යමක් දීම ගැන ලියන්නට සිතන විට සිහියට නැගෙන්නේ තමා දැනටමත් ඇප කැප වී සිටින ගීතිකා කණ්ඩායමට අතිශය උද්යෝගිමත් ලෙස උපදෙස් දෙන දේශකයෙකු පිළිබඳ මතකයකි. ඇත්තෙන්ම මා ඒ ගැන ලියන්නට තරම් ධෛර්යයක් ලැබුවේ එය විටින් විට මා මනස තුළ නිතර ඉහළ පහළ චලනය වන බැවිනි. එවැනි ගීතිකා කණ්ඩායමක් උසස් කොට සැලකීම මෙන්ම එය පැසසීමද අත්‍යවශ්‍ය වේ. එමෙන්ම ඒ වෙනුවෙන් ඔවුනට ස්තුතිවන්ත විය යුතුය. එවන් හඬවල් තව තවත් හැඟීම්බර ව ගැයීම සඳහා නැවත නැවතත් අභිප්‍රේරණය කළ යුතුය.

හැම කේවල අමෙරිකානු දානපතියෙකුම පාහේ පිළිකා සමාජ, රතු කුරුසය, ගැළවීමේ හමුදාව, මිත්‍රත්ව සමාජ, දෑකැති, සෛල රක්තහීනතාව, අමෙරිකානු යුදෙව් සමාජය සහ අර්බන් ලීගය වැනි සමාජ සංවිධාන සජීවිව පවත්වාගෙන යාමට දායක වේ. එසේම පල්ලි පදනම, මුස්ලිම් පල්ලි පදනම, බෞද්ධ සිද්ධස්ථාන, පූජනීය සෛතාම් කණ්ඩායම්, විවිධ නිළධාරීන්, නගර සහ සමාජ ශාලා ඊට ඇතුලත් කළ විට ලැයිස්තුව තවත් දිගු වෙයි. කෙසේ නමුත් මේ සියල්ල සඳහා ඉතා ඉහළ මූල්‍යය දායකත්වයක් ලැබෙන්නේ දානපතියන්ගෙනි. පරිත්‍යාගශීලීන්ගෙනි.

'Philanthropy' යන වචනය අපට ලැබුණේ ග්‍රීක භාෂාවෙනි. 'Philo' යනු ආදරය කරන්නා වේ. 'anthro' යනු මිනිස්වර්ගයා වේ. ඒ අනුව, 'Philanthropist' යනූ මුලු මහත් මිනිස්වර්ගයාට ආදරය කරන්නා වේ. පරිත්‍යාගශීලීහූ මිනිසුන් සඳහා ඉතා සංකීර්ණ සංවිධානයමය සහ සංකල්පමය ව්‍යූහයන් ගොඩනගමින්ද පනවමින්ද ඔවුන් වෙනුවෙන් රැකියා ස්ථාන මෙන්ම ක්‍රීඩා කිරීම සඳහා වූ ස්ථානද තනවා දෙති. සමාජයට වඩා යහපත් සෞඛ්‍යය තත්වයක් සහ අධ්‍යාපනයක් ලබාදීමට කටයුතු කරන ආයතනයන්ට ඔවුන් විශාල වශයෙන් මූල්‍යමය පරිත්‍යාග සිදුකරති. එසේම ඔවූහූ කලාවෙහි ප්‍රධාන අනුශාසකවරු වෙත්.

ත්‍යාගශීලීත්වය පිළිබඳ සඳහන් කිරීමම මගේ මුවට මඳහසක් කැඳවයි. හරියටම එය, මුහුණුවර කෙසේ දැයි හරිහැටි නොදන්නා ත්‍යාගවන්තයෙකු විසින් බලාපොරොත්තු නොවූ විටෙක ගෙන එන ලද මහත් වාසනාවකැයි යන හැඟීමෙන් මතුව එන්නක් වැනිය.

තමා දානපතියන් පරිත්‍යාගශීලීන් ලෙස හඳුන්වාගන්නා බොහෝ දෙනෙකු අප අතර වේ. දානපතියන් නියෝජනය කරන කමිටු සහ නියෝජිත සමුළු ඇත. එහෙත් ඒවා ඔවුන්ගේ ත්‍යාගශීලිවන්ත භාවයේ ඵලයන් අත්විඳින්නවුන්ගෙන් බොහෝ දුරස්ථ ය. ඔවුන් හා සෘජු ලෙස අසම්බන්ධිතය. මම එවන් හවුලක සාමාජිකාවක නොවෙමි.

එහෙත් මම ත්‍යාගවන්තියක වෙමි. මන්ද යත්, හැමවිටම 'ත්‍යාගශීලි' යන්න තුල බලපැවැත්වෙන්නේ "මට සෑහෙන පමණටත් වඩා දේවල් හිමි වන විට ඔබට ලැබෙන්නේ සෑහෙන පමණටත් අඩුවෙනි. එබැවින් මා සතු අතිරික්තය ඔබ හා බෙදා හදා ගන්නට මම කැමැත්තෙමි" යන්න වීමයි.

"මා සතු අතිරික්තය භෞතික වශයෙන් ස්පර්ශ කළ හැකි මුදල් හෝ බඩු බාහිරාදිය වුවද කම් නැත. මා ඉගෙන ගත් පරිදි බිඳිගිය හැඟුම් වලට පිළියම් කළ හැකි ඉඟියකින්, වචනයකින් ගෙන එන්නට හැකි ප්‍රීතිමත් මොහොතක් මෙන් ස්පර්ශ කළ නොහැකි යමක් වුවද කම් නැත."


ලෝකය පිළිබඳ මගේ දැක්මත් ඒ තුල මට හිමි තැන ගොඩනැගූ ආකාරයත් මා උගත්තේ මා හදා වඩා ගත් මගේ අත්තම්මා ගේ (පියාගේ මව) අසිරිමත් බලපෑමෙනි. ඇය ගෞරවයේ ප්‍රතිමූර්තිය වූවාය. මුදු ලෙස කතාබහකරන්නියක වූවාය. විටෙක ඇඟිලි එකිනෙක පටලවා දෑත් පසුපසට කොට බැඳ සෙමින් ඇවිද යන්නියක වූවාය. මා ඇගේ සෙවණැල්ල යයි අසල්වැසියන් කියන තරමටම මම ඈ අනුගමනය කළෙමි.

"හෙන්ඩර්සන් සහෝදරී, හෙවණැල්ල පස්සෙන්ම නේද?" ඔවුහු අසති.

එවිට අත්තම්මා, මා දෙස බලා සිනාසෙන්නීය.

"ඒක නං එහෙම තමයි. නැවතුනත් මා එක්ක, ගියත් මා එක්ක."

මට වයස අවුරුදු දහතුනක් වන විට කැලිෆෝර්නියාවේ වෙසෙන මගේ මව වෙත අත්තම්මා විසින් මා කැඳවාගෙන යන ලදී. මා එහි නතර කළ ඈ ආ පයින්ම ආපසු ආර්කන්සාස් බලා පිටත්ව ගියාය. කැලිෆෝර්නියා නිවස, ආර්කන්සාස් හී මා හැදී වැඩුණු පුංචි නිවහනට වඩා බෙහෙවින් වෙනස් ලෝකයක් විය. මගේ මව නවීන විලාසිතානූකුලව කොණ්ඩය සකස් කරන්නියක වූවාය. කෘතිම ලෙස කැරලි ගස්වනු ලැබූ ගැහැණුන්ගේ කොණ්ඩා පිළිබඳ අත්තම්මාට කිසිදිනෙක විශ්වාසයක් තිබුණේ නැත. එබැවින් මා හැදී වැඩුණේ කුඩා කළ සිටම සොබාවික ලෙස ගෙතූ සිහින් කොණ්ඩා කරල් සමගිනි. අත්තම්මා පුවත් ඇසීම සඳහා ගුවන් විදුලිය දමන්නීය. ආගමික සංගීත ඛණ්ඩ සහ ගුවන් විදුලි නාට්‍යයට සවන් දෙන්නීය. කැලිෆෝනියාවේ ජීවත්වෙන මගේ මව නිතර තොල් ආලේපන ගල්වන්නීය. මහ හඬින් ජෑස් සහ බ්ලූ සංගීත ඛණ්ඩ තැටියක වාදනය කරවන්නීය. ඒ කිසිවකට මම අයත් නොවූයෙමි. එබැවින් පිටුපසට ඇද සිහින් කැරලි වලට ගොතා තිබූ කොණ්ඩයද සමගින් ක්‍රිස්තියානි ගීතිකාවක් මුමුණමින් ඇඟිලි පටලවා දෑත් පිටුපසට කොට තබා ගෙන මම ආගන්තුක ලෝකයේ වටපිටාව නරඹමින් ඇවිද ගියෙමි.

පුරා සති දෙකක් තිස්සේම අම්මා මා දෙස අවධානයෙන් බලා සිටියාය. අවසන එකිනෙකා කෙරෙහි තවදුරටත් ආගන්තුක නොවණු පිණිස වූ කතා බහකට ඈ මුලපිරුවාය.

"මායා ඔයා මට අකමැති මං කොහෙත්ම ඔයාගේ අත්තම්මා වගේ නොවෙන හින්දයි. ඒක ඇත්ත. මං අත්තම්මා වගේ නෙවෙයි. ඒත් මං ඔයාගේ අම්මා. මගේ ජීවිතෙන් කොටසක් මං වැයකරන්නේ ඔයාට ඉතාම හොඳ ඇඳුම් අරන් දෙන්න. ඔයාට හොඳම කෑම කවන්න. ඒ වගේම ඔයාට හෙවණක් හදලා දෙන්න. ඔයා ඉස්කෝලේ ගියාම ටීචර් ඔයා දිහා බලලා හිනා වෙයි. එතකොට ඔයාත් පෙරලා එයාට හිනාවකින් සංග්‍රහ කරාවි. මම ඔයාගේ අම්මා. මට ඕනෑ එකමෙක දෙයක් විතරයි. ආගන්තුකයන් වෙනුවෙන් ඔයාගේ මූණේ එක හිනාවක් නගන්න ඔයා උත්සහ කරනවා නම්, මං වෙනුවෙනුත් එහෙම කරන්න. ඇත්තෙන්ම මං ඒක හුඟක් අගය කරනවා. මට ඒක හුඟක් වටිනවා, මං පොරොන්දු වෙනව."

අම්මා ඇගේ අතක් මගේ කම්මුල මත තබා සිණාසුණාය.

"කෝ, එක වතාවක් අම්මා වෙනුවෙන් හිනාවෙන්න."

ඕ විසුළු මුහුණක් මවා පෑවාය. මගේ කැමැත්තට සහ සියළු අභිප්‍රායන්ට පටහැනිව මම සිනාසීමි. එවිට ඕ මා ආදරයෙන් සිප ගත්තාය. පසුව හඬන්නට පටන් ගත්තාය.

"ඔයා මෙහාට ආවට පස්සේ හිනාවෙනවා මං දැක්ක පළවෙනි අවස්ථාව මේක. ඒක කොයි තරම් ලස්සන හිනාවක්ද? අම්මගේ ලස්සන පුංචි දෝණිට ලස්සනට හිනාවෙන්න පුළුවන්"

කිසිවෙක් කිසිදිනෙක මා ලස්සන යැයි කියා නොතිබිණි. මගේ ජීවිත කාලය තුලම කිසිවෙක් මට 'දෝණි' යයි ආමන්ත්‍රණය කර තිබුණේද නැත.

තව කෙනෙකුගේ මුවට එකමෙක සිනාවක් කැඳවමින් ඉතා ලෙහෙසියෙන්ම ත්‍යාගශීලියකු වන්නට මම එදින උගත්තෙමි.

කෙනෙකුට සහනයක් සහ සැනසුමක් ගෙන එන එක් කාරුණික වදනක් යනු ඉතා අගනා ත්‍යාගයක් බව ගතවුණු වසර ගණනාවම මට උගන්වා තිබිණි. එබැවින් මා සිටිනා තැන වෙනස් කරමින් අනෙකා වෙනුවෙන් වූ ඉඩක් වෙන්කිරීමට මට හැකිය. කෙනෙකු තෘප්තියට පත් වන්නේ නම් මගේ සංගීතය වාදනය කිරීමට මට හැකිය. එසේම කෙනෙකු ඉන් අපහසු තාවකට හෝ කරදරයට පත් වන්නේ නම් එය නිවා දැමීම ද කළ හැකිය.

ජීවිත කාලය තුල කෙදිනක වත් මා දානපතියෙකු ලෙස කිසිවෙකු දැන නොසිටිනු ඇත. එහෙත් මම මුළු මහත් මානව වර්ගයාටම ප්‍රේමකරන්නියක් වෙමි. තවද පැකිළීමකින් තොරව මා සතු සියළු දේ ඔවුන් වෙනුවෙන් දෙන්නට මම ඉදිරිපත් වෙමි.

මම ත්‍යාගවන්තියක වෙමි.

"ලෙටර් ටු මයි ඩෝටර්" - මායා ඇන්ජලෝ

මායා ඇන්ජලෝ
පරිවර්තනය - චතුෂ්කා නිමේදි රණවීර



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails