Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



තවද එක් සමයෙක් හි මිහිඳු නම් රජ කෙනෙක් දැහැමෙන් නොවෙතත් සෙමෙන්, රටෙහි ජනයාගේ කැඳ පත ද උදුරා ගනිමින් රාජ්‍ය කරන සමයෙහි සළෙල කෙළි කෙළන රාජ රාජ මහාමාත්‍ය පුත්‍රයන් නිසාවෙන් මහත් ඝෝෂාවක් පැන නැංගේය.

ඒ කෙසේ ද යත්?

එක් සමයෙක් හි තිරිසන් යෝනියෙහි උපන්නවුන් ක්‍රියා කරන පරිද්දෙන්, ඉස් සිඳීම, අත් පා සිඳීම, තෙල් කටාරම් හි ලෑම, දිවැස් හුල තැබීම, ලජ්ජාස්ථාන සිදුරු කිරීම ඈ නේක වධ කරවා සැට දහසක් මානවකයින් මානවිකාවන් රජහු ගේ අණ පරිද්දෙන් ඝෝර මාර තෙම වෙත යවන ලදැයි චෝදනා කොට ජනී ජනයා විසින් පිළිකෙව් කරන ලද රාජ පාක්ෂික රාජ පුරුෂයන් මුළුල්ලක් කඳවුරු ළා රජුන් සුරකිමින් දිවි ගෙවන්නාහ.

මෙසේ කල් ගත වන්නේ රජුන් හට මහත් සතුරු බියක් පැන නැංගේය. එය කොතෙක් වූවා ද යත් රටෙහි ජනයාට මඟ තොටක යා නොහැකි පරිද්දෙන් කොලහල මහත් වූයේ ය.

එසේ වූ කල රජුන් ද, ඇමැත්තන් ද මතු නොව යට ගිය දවස වධයෙන් මිය ගිය සැට දහසක‍් මානවක මානවිකාවන්ගේ සෝවුරන් පිරිසෙක් ද මන්ත්‍රණ කොට ඒ වධකයන් කෙරෙහි මැ ගොස් වධක මාලා වූ රක්ත වද මාලා ආදිය ඉවත් කරවා මානෙල් ඈ පුෂ්පයන් පළඳා විරුවනැයි අබිසෙස් කොට සතුරු සේනා අබියසට යැවූහ. සැට දහසකට කළ යුත්ත කෙලෙම් නම් මේ සතුරන්ගේ කම් කිමැයි මහත් එඩියෙන් සටන් වැද සතුරු එඩි දර්ප මැඩලා පියා පෙරලා පැමිණියාහ.

සතුරු එඩි බින්ඳහාම උහු අත්තුක්කංසනයෙන් මැඩී ගියේ තමන් තරම් අනෙකෙක් නැතැයි සිතමින් මානයෙන් ඔද වැඩී විනිශ්චයාසන දරන විනිසුරන් පවා මැඩලමින් දවසරින්නේ, එක් රාජපුරුෂයෙක් රජුගේ සමීප මහාමාත්‍යයෙකුගේ පුත්‍රයෙකු හා කොලහලයකට එළැඹ මහත් සේ බැට කා මහමග වැද හොත්තේ, විනිසුරන් අබියස තමාම තමා හට බැට දී ගත්තේ යයි තෙපලන්නට වීය. මෙනයින් මෙකී රාජ පුරුෂ විරුවන්ගේ දර්පය මඳක් බැස ගියේය. යුවරජ තෙම මැදිහත්ව එකී රාජ පුරුෂයන්ගේ මන් බිඳ දමන්නේ, උහු නගරාලංකරණයට යෙදවූහ. උදළු ගාන්ට, උයන් තනන්ට මතු නොව සී සාන්ට හාන්ට පවා පවරන ලද්දේය.

යට කියන ලද රාජ රාජ මහාමාත්‍ය පුත්‍රයෝ වනාහි වචනයේ පරිසමාප්තාර්ථයෙන්ම සළෙල වරම ලද්දෝ වෙති. නේක වර්ණ සුසිනිඳු කසී සලු දරමින්, පියුම් මාලාදිය ගෙල දරමින්, මනහර නා මෙනවියන් වැනි අඟනුන් උර මත්තෙහි දරමින් කාමෝත්සව පවත්වන්නෝය. දෙව් විමන් පරයන රථයන්හි නැඟැ මාතලී දිව්‍ය පුත්‍රයාට නිගා දෙවමින් ප්‍රධාන නගර ද්වාර වසා රථ කෙළි කෙළන්නෝය.

එක් ජල ක්‍රීඩා සමජ්ජයක් පැවැත්වෙන්නේ, යටකියන ලද අමාත්‍ය පුත්‍ර රත්නයක් ද ප්‍රධාන රාජ පුරුෂයෙක්ගේ පුත්‍ර රත්නයක් ද එක්තරා ස්ත්‍රියක් අරභයා කොලහල කරන්නේ, රාජපුරුෂපුත්‍ර තෙම මහත් බැට කා දුස්සාධ්‍යව වැදහොත්තේය. ඉදින් මෙකී පිනැති රාජ අමාත්‍ය පුත්‍රයන් වළහනු කිසිවෙක් තාවතිංසය ඈ දෙව් ලෝකයන්හිත්, අකනිටා ඈ බ්‍රහ්මලෝකයන්හිත්, අවීචිය ඈ අපායන්හිත් නැත්තේමය.

මෙවැනි රටක ජනයාව ඉපිද මෙවන් ආශ්චර්යයන් දර්ශන මාත්‍රයෙන් පවා වින්දනය කිරීම මහත් සැපයකැයි කියමින් ජනයා දෙව් බඹ සුර නා සැප පවා අළුයම ලූ කෙල තලි සේ පිළිකෙව් කරමින් ප්‍රීතියෙන් ඉපිලෙමින් රාජ රාජ මහාමාත්‍ය ආදීන්ගේ දෙමව්පියන් නිරතුරුව සිහි කරමින් දවස ගෙවන්නෝය. ෴

සඳුන් ප්‍රියංකර විතානගේ



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails