Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



රාත්‍රිය දිගු විය..
තුවාල ගැඹුරු විය..
අගල් අඳුරුව තිබුණි..
ප්‍රාකාර,
නැගෙනු බැරි තරමට
දුෂ්කරව නැගී ගති.

දුර ඈත වෙරළක
මිය ගිය නිල් සඳක් යට
ඔබට අත පොවනු නොහැකි දුරකින්
කෙස් වැටියෙන් අල්ලා මා ඇදගෙන යන ලදි
ඔබේ අත් බැඳ තිබුණි
ඔබේ මුව බැඳ තිබුණි
අඩුම තරමින් ඔබට
මගේ නම කියා
හඬගාන්නටවත් ඉඩක් නොලැබුණි
ඔබ කිසිදු පිහිටක් නැතිව...
මා මෙන්ම....
අවාසනාවක මහත!
ඉතිහාසය පුරාම
ඔබ ලැජ්ජාවේ අඩයාලම
දරා සිටියෙහිය.

යළි කියන්නෙමි ...
රාත්‍රිය දිගු විය..
තුවාල ගැඹුරු විය..
අගල් අඳුරුව තිබුණි..
ප්‍රාකාර,
නැගෙනු බැරි තරමට
දුෂ්කරව නැගී ගති.

නමුත් අද,
ඉපැරණි ආත්මයන්ගේ හඬ නැගෙයි
වසර සියවස් ගණනක් පුරා
මහා සාගර මුහුදු හරහා
හදවතේ ගැඹුරු වදනින් අප අමතයි
‘එක්ව පෙළ ගැසී
පරපුර රැකගන්න..
දුර ඈත යම් තැනක දී
නිදහස වෙනුවෙන්
දැනටමත් ඔබ වන්දි ගෙවා ඇත. ‘
අපේ වහල් කමේ යදම්වලින්
නැවත නැවතත්
වන්දි ගෙවා ඇති බව
ඔවුහු සිහි ගන්වති.

රාත්‍රිය දිගු විය..
තුවාල ගැඹුරු විය..
අගල් අඳුරුව තිබුණි..
ප්‍රාකාර ....
නැගෙනු බැරි තරමට
දුෂ්කරව නැගී ගති.

අප ජීවත් වූ .. අදටද ජීවත් වන
නරකාදිය
අපේ ඉන්ද්‍රියයන් තියුණු කොට ඇත.
අධිෂ්ඨානය දැඩි කොට ඇත.
මේ උදෑසන ඔබේ සංතාපය තුළින්
ඔබේම ආත්මය තුළට එබෙමි,
එකිනෙකා සමග
අපට සම්පූර්ණ විය හැකි බව දනිමි..
ඔබේ ඉරියව් , සැඟවූ යටගියාවන් අතරින් බලමි
ඔය විසල් දුඹරුවන් ඇස් තුළ
දරු පවුල කෙරෙහි වන ආදරය දකිමි

මම මෙසේ කියන්නෙමි...
අත්තල නගන්න! එක්වන්න මේ හමුවන්නන්ගේ බිමෙහි
අත්තල නගන්න! ඇසුරු කරමු එකිනෙකා සමඟ ප්‍රේමයෙන්
අත්තල නගන්න! එක්ව නැගෙමු පහත් වූ මාවතෙන්
එක්ව නැගෙමු අපේ ම ජීවගුණයන් කැටි කොට
එකට එක්වෙමු, පිරිපහදු කොට ගනිමු ආත්මයන්
අත්තල නගමු, උඩඟු බව හැරලමු...
අපේම අතීතය මවා පෙන්වීම නවතමු
නැවත අඬගසමු, ඒ මුළුගැසුණු, කොන් කෙරුණු ජීවයට
අත්තල නගමු!
කැඳවමු අපි,
ප්‍රමෝදය, මේ සංවාදයන් වෙත
අචාරශීලීබව, නිදන කාමර වෙත
මෘදුබව, මුළුතැන්ගෙයට
සුරුකිබව, පෙරපාසල් වෙත

පැරැන්නෝ සිහි කැඳවති,
ඉතිහාසය වේදනාබර මුත්
අප ඉදිරියට යන පරපුරක් බව
නැවත නැගිටින මිනිසුන් බව...

යළි යළිත්....
අපි නැගිටිමු!

[මායා ඇන්ජලෝ ගේ 'Million Man March Poem' පද්‍යයේ පරිවර්තනය]

*'Million Man March' යනු ඇමරිකාවෙහි වසන කළු අමෙරිකානුවන් දස ලක්ෂයකට අධික පිරිසක් වොෂිංටන් ඩී. සී. වෙත රැස්ව සිය අයිතිවාසිකම්, එකමුතුබව සහ පවුල්වල වටිනාකම් අවධාරණය කිරීමට සංවිධානය කරන ලද දේශපාලනික පෙළපාලියකි. 1995 ඔක්තෝබර් 16 වැනිදා පැවැත්වුණු මේ රැළිය ඇමරිකානු ඉතිහාසයේ එතෙක් පැවැත්වුණු එබඳු ජනතා එකතුවීම්වලින් විශාලතම ඒවා අතරට එක් වෙයි. ඉහත සේයාරුවෙන් එම රැළියේ අවස්ථාවක් දැක්වේ.

මායා ඇන්ජලෝ
පරිවර්තනය - මාලතී කල්පනා ඇම්බ්‍රෝස්



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails