Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



ආරක්‍ෂක අමාත්‍යාංශයේ ලේකම් ගෝඨාභය රාජපක්‍ෂ මහතා මාධ්‍යවේදී ටිරන් කුමාර බංගමගමආරච්චි මහතා සමග කළ කෙටි ප‍්‍රශ්නෝත්තර සටහනක් 2013.07.21 දින රාවය පුවත්පත පළ කළේය. ලේකම්වරයාගේ පිළිතුරු වලින් ඉතා පහසුවෙන් මතුකළ හැකිව ඇති ප‍්‍රශ්න නොඅසා සිටීමට තරම් ටිරන් ප‍්‍රවේශම් වී ඇත. සිය ප‍්‍රාණයට කවුරුත් ආදරේය. එහෙත් නිදහසින් පසු ශ‍්‍රී ලංකාව ගෙවා තටමන අදවන් බිහිසුණු යුගයක මනුෂ්‍යත්වයේ අසීරු වාසනාව උරගා බැලීම යනු ප‍්‍රාණ පරිත්‍යාගයන්ගේ සත්‍යය පරීක්‍ෂාවක් වන සීමා මායිම වෙතට අප කෙමෙන් ළං ළංව ඇති බව ටිරන්ට නොහැ‍ඟෙනවාදැයි නොහඟමි.

මගේ විශ්වාසය වන්නේ තමන්ට පැවරී ඇති භූමිකාව පිළිබඳ ගෝඨාභය මහතා අතිශය සවිඥාණික වන බවයි. භීතිය හා ජාතිවාදය පිළිබඳ ඔහුගේ අවලෝකනයන් තීක්‍ෂණය. විජේවීර හා ප‍්‍රභාකරන් යනු දක්‍ෂ නායකයන් දෙපළක් බව කියා සිටින ඔහු භීෂණය පාලන උපක‍්‍රමයක් ලෙස නඩත්තු කිරීමේ භාවිතයක මේ දෙනොම නිරතව සිටි බවත්, ප‍්‍රභාකරන් විසින් දෙමළ ජනතා අනුමැතිය දිනාගැනීමේ උපායමාර්ගයක් ලෙස ජාතිවාදය යොදාගත් අයුරුත් පහදා සිටී. ගෝඨා තවත් දුර යමින් කොමියුනිස්ට්වාදය හා ජාතිවාදය අතර වෙනස කියවමින් මොන වාදයටත් වඩා ජාතිවාදය යනු මිනිසුන් අතරට පහසුවෙන් යා හැකි මාර්ගයක් බවට ද සිහිපත් කර සිටී. "...භීෂණය හා ජාතිකවාදය..." එහි ඓතිහාසික සාර්ථකත්වයේ උසස්ම පාඩම අද දවසේ පැහැදිලිව ධාරණය කරගත් චරිතය වන්නේ ආරක්‍ෂක ලේකම්වරයාය. මන්දයත් ඔහු යොදාගන්නා මූලික අවි යුගලය වන්නේ ද එය වන බැවිණි.

නොබෝදා මාධ්‍ය ආචාර ධර්ම පිළිබඳ පැවති සංවාදයකදී පාර්ලිමේන්තු මන්ත‍්‍රී සුමන්තිරන් මහතා සභාවෙන් විමසූ පැනයක් වූයේ ගෝඨාභය ගැන කාටූනයක්වත් නොඇඳෙන්නේ ඇයිද යන්නයි. ගෝඨාභය මහතා විසින් ලාංකේය සිවිල් සමාජය තුළ පතුරුවා ඇති භීෂණයේ පරිමාව මින් පැහැදිලි කෙරෙන බව ඔහු තවදුරටත් දක්වා සිටියේය. බොදු බල සේනාවට බිය විය යුතු නැතැයි වරෙක කියා සිටි ගෝඨා මෙහිදී පෙරළා අසනු ඇත්තේ "මට බිය වන්නේ කුමකට ද" යන්නයි. පිළිතුර අති සමීප දෘෂ්‍යමානයකි. ඒ ඔබ එසේ අසන නිසාමය යන්නයි.



අසත්‍යය වපුරමින් ජනතාව මුලා නොකොට යථාර්ථය සියැසින් දැක ගන්නා ලෙස ආරක්‍ෂක ලේකම් ගෝඨාභය රාජපක්‍ෂ මහතා විපක්‍ෂයෙන් ඉල්ලා සිටි බව දැක ගන්නට ලැබුණු නිසා එයට එකඟව මම මෙසේ කියන්නෙමි. ගෝඨාභය චින්තනය යනු ශ‍්‍රී ලංකාව විශාල අන්තරායක් වෙතට කැඳවාගෙන යන එක් ප‍්‍රවණතාවයකි. සංවර්ධනය, ජාතික ආරක්‍ෂාව, ප‍්‍රජාතන්ත‍්‍රවාදය හා බුද්ධාගම පිළිබඳව වන ඔහුගේ පරිකල්පනය ඊට දෙස් දෙන බව පෙනේ.

ගෝඨාභය චින්තනයට අනුව නාගරික සංවර්ධනය යනු නාගරික ගෘහ නිර්මාණ අලංකරණයයි. නාගරික සංස්කෘතිය පිළිබඳ කිසිදු දියුණු දැක්මක් මින් පිළිඹිබු නොවේ. ඔහුට අනුව ජාතීන්ගේ ප‍්‍රශ්නය යනුවෙන් දෙයක් කිසිදා තිබී නැත. උතුර මිලිටරි යටත්කරණයක් තුළ අඛණ්ඩව පවත්වා ගනිමින් භෞතික සංවර්ධනයේ ඇතැම් ප‍්‍රාථමික අංශ එහි පතුරුවා හැරීමෙන් මතුවන විරෝධයන් යටපත් කළ හැකි යැයි ඔහු සිතයි.

ජාතික ආරක්‍ෂාව යනු ‘ඔහු දකින ජාතියේ’ ආරක්‍ෂාවකි. ඒ සඳහා මිලිටරි තීරණ ඍජුව ගත යුතුව ඇත. යුද්ධය, ත‍්‍රිවිධ හමුදාව හෝ පොලීසිය ප‍්‍රශ්න කිරීම මාරාන්තික අනාරක්‍ෂාවකි. සේනාධිනායක, ත‍්‍රිවිධ හමුදා හා පොලීසියට බලය ලැබී ඇත්තේ ව්‍යවස්ථාපිත ජනතා පරමාධිපත්‍යයෙන් බව සංකල්පීයවත් හඳුනා ගැනීමට කිසිදු අවසරයක් නැත. ජාතික ආරක්‍ෂාව යනු ප‍්‍රජාතන්ත‍්‍රවාදී සම්භාෂණයක සමාජ ගිවිසුමක් ලෙස ඔහු නොදකියි. කලාව හා නිදහස් මාධ්‍යකරණය යනු සිය ව්‍යාපෘතියට බිහිසුණු තර්ජනයක් ලෙස දකින ගෝඨාභය චින්තනය විසින් අනාගත කලාව ලෙස යෝජනා කරන්නේ හුදු මිලිටරි ප‍්‍රචාරණයකි. සංජීව පුෂ්පකුමාරගේ ‘ඉගිල්ලෙන මාළුවෝ’ චිත‍්‍රපටයට දැක්වූ මර්දනය එහි උමතු ප‍්‍රකාශනයකි. එම චින්තනය විසින් ඉතිහාසයේ සිටම රට රැකගත්තේ මහා සංඝරත්නය යැයි කියමින් බුදුන් වහන්සේගේ උතුම් සදහම් ඉගැන්වීම්වලට පවා අමු අමුවේ නිගා දෙන චීවර බලවෙග මහ පාරට සැපත්වීම අනුමත කරයි. සකලවිධ දේශීය විදේශීය ත‍්‍රස්ත බෙදුම්වාදී තර්ජනයන්ගෙන් රට ජාතිය රැක ගැනීම සඳහා රට පුරා අයෝමය මිලිටරි අණසකක් පවත්වා ගැනීමට දැඩිව පෙනී සිටින අතරම ඊට සපුරා පරස්පරව සිය රෙජීමය ප‍්‍රමුඛ කරගනිමින් ගොඩනැගෙමින් තිබෙන නීතියට ඉහළින් වැජඹෙන නව පාදඩ ධනේෂ්වර පංතියක ත‍්‍රස්තවාදය සුරක්‍ෂිත කරලයි; සුජාත කරවයි.



කිසිදු විවෘත සංවාදයකට අභිමුඛ නොවන, සිය භාවිතය ප‍්‍රශ්න කරන අවකාශ විවිධ ක‍්‍රම වලින් මර්ධනය කරලන හා වෛරීයව පළිගන්නා සුළු විනයක් යනු කෙතරම් කාර්ක්‍ෂම වුවද අශිෂ්ටත්වයකි. සංවර්ධනය යනු ප‍්‍රජාතන්ත‍්‍ර විරෝධීව කළ යුතුව ඇති ආදර්ශයක් යැයි ඇදහීම හදිසි කෝපයෙන් පීඩා විඳින සීමිත බුද්ධි පරිමාවක ප‍්‍රතිඵලයකි.

මට අනුව ගෝඨාභය රාජපක්‍ෂ මහතා යනු බි‍්‍රතාන්‍ය පාලනයේ අවසන් භාගයේ සිට පැන නැගෙමින් ආ සිංහල ජාතිකවාදයේ නූතන ප‍්‍රබුද්ධත්ව ප‍්‍රවණතාව එහි අවසන් මරණය සලකුණු කිරීමේ සංකේතයකි. එමෙන්ම එම යුගයේම නිර්මාණය වූ සිංහල-බෞද්ධ පසුගාමී අන්තවාදී ප‍්‍රවණතාවය ලැබූ දේශපාලන විජයග‍්‍රහණයේ සංකේතයකි.

ගෝඨාභය මහතා කොළඹ ආනන්ද විද්‍යාලයේ ආදි සිසුවෙක් වන අතර මම ද එහි ආදි සිසුවෙක්මි. මම දකිනා පරිදි දෙමළ ජනයා සංවිධානමය ලෙස අවි ගන්නා තැනට තල්ලු කරලූ පදනම් නිර්මාණය කරලීමේ ඓතිහාසික භූමිකාවට පණ දුන් පාසලකි ආනන්දය. එසේම කලින් කී නූතන සංස්කෘතික ප‍්‍රගතීශීලීත්වය වෙනුවෙන් සිංහල සමාජය සංවිධානය කළ ඉතිහාසයක් ද ආනන්දය සතුය. ගෝඨාභය මහතා යනු පළමුව කී උරුමයේ වත්මන් බලසම්පන්න ප‍්‍රකාශනයයි. සිංහල-බෞද්ධ ජාතිකවාදය යනු ඒකීය සමස්තයක් ලෙස නාමකරණය කරනවාට අමතරව එය විවිධ ප‍්‍රවණතාමය උපාංගයන්ගේ සුසම්බන්ධීය තර්කණයක් ලෙස හඳුනා ගැනීම දේශපාලනිකව වැදගත් වන බව මම විශ්වාස කරමි. ඒ පිළිබඳව විශ්ලේෂණාත්මක විග‍්‍රහයන් සැපයීම ඉදිරියට තබා ගෝඨාභය ප‍්‍රපංචය ඒ වෙනුවෙන් සපයන මෙහෙය අතිමහත් වන බව කිව යුතුව ඇත.

2013.07.25

[උපුටනය- DisneyLanka වෙබ් අඩවියෙනි.]

විදර්ශන කන්නන්ගර



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails