සිතක් අත ගෑ සුවඳ තවරා
අමාවක රෑ සඳට පවරා
කිඳුරි අතහැර දුරක කිඳුරා
නික්මුණා යළි එමි'යි කොඳුරා
සුවඳ මල් විල් අනෝතත්තය
සිඳී යනවලු ආ වසන්තය
මෙතෙක් නොදුටුව සුව අනන්තය
රැගෙන එයි හේ රිදී කොන්තය
කිඳුරි තෙම පැටවුන්ට ළංවී
කියයි වං හුං විලෙන් වෙන්වී
රකුස් ඇස් බෝ සෙයින් පේවී
බලයි විල් තෙර අඳුරෙ නෑවී
මුවන් පසු පස පැමිණි බඹදත්
හොඳින් දැනගෙන කිඳුරු නැති තත්
අනවසර ලෙස බින්ද පතිවත්
කිඳුරි හැර වෙන කෙනෙක් නොදනිත්
කඳුළු දිය විල් තෙරට එක්වී
තව තවත් රළ ඉහළ නැංවී
ළසෝගිනි දී රකුස් ළංවී
කිඳුරු පැටවුන් ගියා වෙන් වී
විල් තෙරක පෙර ඇහිලු සිහිනය
ගෙන කිඳුරු තෙම එන්නෙ මෙදිනය
වස් දඬුව නැත බොල් වු පවනය
ගොලු වු විල ඇඳ ශ්වේත අඳනය
දිනේෂ් සිල්වා
