Colombo Time

BOONDI " L i v e "

Google Groups
Subscribe to BOONDI " L i v e " | බූන්දි සජීවී සංවාද
Email:
Visit this group

බූන්දියට එන පාර

වයර් දිගේ- boondionline@gmail.com | ගොළුඛෙලි තැපෑලෙන්- බූන්දියේ අපි, 190/3/A, කැන්දලියැද්දපාළුව, රාගම.

Followers



මෙන්න
බුදු හිමි කෙනෙක් වැඩලා
පරන්තන් හංදියට
හදිසියේම

පාපැදිය වැනෙනවා
තිගැස්සී සිත සැලෙනවා
පුරන් ලුණු කෙත සිසාරා එන
සුළඟ සියොළඟ දවනවා

ඇයි ද මේ බුදු කෙනෙක්
පරන්තන් හංදියට?

ඉරවල් හතක ගින්නේ දැවුණු
මුරුගසන් මහ වැස්සේ තෙමුණු
කල්පාන්තයට පස්සේ නිවුණු
පොලොවකයි ආයෙත්
බුදු හිමි කෙනෙකු පහල වන්නේ

මේ බුදු හිමි කවුද
හදිසියේ විරාජමාන වී
මං සංදියේ වැඩ හිඳ
මග දෙපස යනෙන අය දෙස
විපරමින් ඉන්නා ?

ගෞතම බුදුන් නම් දැවුණා
ඇස් දෙකට දැක්කා
කාලෙකට ඉස්සර
අපි තරුණ සංදියේ
අනුදාහක් පොත් එක්ක
යාපනේ පොත් ගුල තුළම

ආයු සංස්කාරය කර
පිරිනිවන් පාලා නෙවෙයි
ඝාතනය කර
පුස්තකාල දොරකඩ

ගෙවුණු හැම රැයක්ම
ඉන් පසු
යකුන්ගේ සහ භූතයින් ගෙයි
උතුරු දකුණු බේදයක් නැතුව
හතර දිග්බාගයම
ලෙයින් කඳුලින් තෙත් කළ

අහස ගිනි ගෙන දැවුනා
පොලොව දෙදරුම් කැවුනා
බුදුන් නැති දේශයක අපි
හවුහරණක් නැතිව
මැරි මැරිත්
නොමැරීම උන්නා

ගිගුම් දීගන අහස
පොකුරු පොකුරු හෙණගෙඩි
පාත් වෙන විට හිස් මතට
වස් වසා සිටියේද හිමි ඔබ
වැහි වලා වෙස් ගත්
කළුම කළු දුමාරයට
කැමැත්තෙන් රැවටී

බුදු කෙනෙකුන් තබා
යදින්න චූල දෙවියෙකු වත්
සිටියේ නැහැ එදවස
බුරුතු පිටින් ගැහැණු
කණවැන්දුම් වනවිට

නොකියවා ම
ප්‍රේමයේ මුලකුරුවත්
තරුණ විය ගෙවුනා අපේ
ශෘංගාර සිහිනයක
නොරැඳී ම රහසේ ම.

කොහේ සිට වැඩියේද
මෙතේ බුදු නම් නොවන
මේ අලුත් බුදු හිමි
මීට පෙර කිසිදාක වැඩ නොහිඳි
පරන්තන් හංදියට

විශ්වයම දිනූවෙන්
අනන්ත ජින ය බුදු හිමි
එසේ නම් ඇයි මේ
නේක බල සේනා ?
කාගෙන් රැකෙන්න ද
කාට නම් බිය වෙත් ද
අප දන්න බුදු හිමි.

තෙලොවටම අධිපති ය
තිලෝ ගුරු බුදු හිමි
කාට හයිරන් පාන්නද
කාව බිය ගන්වන්නද
මහා වීර වූ
අප දන්නා බුදු හිමි

වාරු නැති පා සැලෙයි
අසමබර පාපැදිය
පදින විට වෙර ගෙන
දෙගිඩියාවෙන්
පසු කර
පරන්තන් හන්දියේ
වැඩ හිඳින අලුත් බුදු හිමි.

අශෝක හඳගම



මේ බූන්දිය ඔබේ මූණු පොතට එක් කරන්න | Share this Boondi on Facebook
Related Posts with Thumbnails